Qostanaı oblysyndaǵy orman órti eldiń azyq-túlik qaýipsizdigine áser etpeıdi – QR AShM

NUR-SULTAN. QazAqparat - 2022 jylǵy 4 qyrkúıektegi sońǵy derekter boıynsha, orman órtteriniń saldarynan Qostanaı oblysynda aýyl sharýashylyǵy daqyldarynyń zardap shekken egistikteriniń azǵantaı ýchaskeleri bar. Bul rette alqaptardyń jappaı órtenýine jol berilgen joq.

Bul týraly QazAqparat QR Aýyl sharýashylyǵyn mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, Qarabalyq aýdanynda 15 ga dándi jáne 2 ga aýmaqta zyǵyr daqyldary órtendi. Meńdiqara aýdanynda 1 ga astyq jınaý alqaby joıyldy. Osylaısha, Qostanaı óńirindegi jalpy egis alańynyń 0,1% - dan az kólemi zardap shekti, al óńirdegi egistiktiń jalpy aýmaǵy 5,3 mln ga quraıdy.

Aıta keteıik, oblystyń sharýalary bıyl 3,9 mln ga dándi jáne dándi-burshaqty, 3,5 mln ga bıdaı jáne 749,1 myń ga maıly daqyl otyrǵyzǵan bolatyn.

Sondaı-aq, bıyl 3 qyrkúıekte óńirde 1,8 mln ga nemese egis alańynyń 45,3% jınaldy, 1,8 mln tonna dándi jáne dándi-burshaqty daqyldar jınaldy.

Osyǵan oraı, QR Aýyl sharýashylyǵy mınıstrligi Qostanaı oblysyndaǵy tabıǵı apat Qazaqstannyń azyq-túlik qaýipsizdigine, ónimniń boljanǵan kólemine, sondaı-aq, eksporttyq ýaǵdalastyqtardyń oryndalýyna eshqandaı keri áserin tıgizbeıtinin naqty málimdeıdi.

«Sondaı-aq, astyq daqyldary boıynsha egin jınaý jumystary respýblıkanyń barlyq óńirlerinde belsendi júrgizilip jatyr. Búgingi tańda dıqandar 7 mln ga dándi daqyl jınady (nemese barlyq astyq kóleminiń 43,7%), 12,2 ts/ga ortasha ónimdilikpen 8,6 mln tonna astyq bastyryldy (2021 jyly uqsas kezeńimen salystyrǵanda ortasha ónimdilik 7,8 ts/ga qurady)»,-delingen Aýyl sharýashylyǵy mınıstrliginiń habarlamasynda.