Qostanaı oblysyndaǵy aýyldar derbes bıýdjetke kóshedi
Jergilikti ózin-ózi basqarýdyń qalyptasýy óńir ekonomıkasyn ilgeriletýge septigin tıgizedi. Sonyń nátıjesinde 2018 jylǵy 1 qańtardan bastap Qostanaı oblysynda turǵyndar sany 2 myń adamnan asatyn 45 aýyldyq okrýg bıýdjettiń derbes deńgeıine jáne jergilikti ózin-ózi basqarýdyń kommýnaldyq menshigin basqarýǵa aýysty.
«Bıýdjettiń 4-shi deńgeıi jumysynyń birinshi jyly aıaqtalyp qaldy. Sondyqtan, osy kezeńde belgili bir qorytyndylar shyǵarýǵa bolady. Bıýdjetti josparlaý men ıgerý, kommýnaldyq menshikti basqarý boıynsha oń úrdisterdi atap ótken jón. Degenmen, barlyq 45 aýyldyń bıýdjeti sýbventsııalyq turǵyda qarastyrylatynyn eskersek, olardyń shyǵyndary óz kiristerinen asyp túsedi, al jetispeıtin qarajat aýdandyq bıýdjetterden óteledi. Jalpy sýbventsııalyqtyń ortasha shamasy 45,4% quraıdy, al jeke aýyldar men aýyldyq okrýgter boıynsha 89,2%-ǵa deıin jetedi. Aýdandyq bıýdjetterge táýeldiliktiń eń tómengi kórsetkishi Áýlıekól aýyly (0,6%), Jitiqara qalasy (1,3%), Qostanaı aýdanynyń Mıchýrınskıı aýyldyq okrýgi (13,5 %) jáne Zatobol kentine ( 19,3 %) tıesili. Al eń joǵary kórsetkish Naýyrzym aýdanynyń Qarameńdi aýyldyq okrýgi (89,2%) men Qarasý aýdanynyń Oktıabrskoe aýylynda (88,2%).
2020 jyldan bastap óńirdegi barlyq 243 aýyldyq okrýg derbes bıýdjetke aýysady. Sol sebepti birqatar kemshilikterdi qazirden durystaý qajet. Endi ár aýylmen jeke jumys isteıtin bolamyz» - dedi Erlan Spanov.
Jergilikti ózin-ózi basqarýdyń derbes bıýdjetin engizý aýyldyq okrýgterdiń qarjylyq múmkindikterin keńeıtýge múmkindik berdi. Ótken 9 aıdyń qorytyndysyn esepke alsaq, 45 aýyl 932,5 mln teńge paıda túsirgen. Bul kórsetkish negizgi jospardaǵydan 12,2 paıyzǵa joǵary. Atap aıtqanda, Qostanaı aýdanynyń Zatobol kenti 164,9 mln teńge, Áýlıekól aýyly 38,4 mln teńge, Sarykól aýyly 36,3 mln teńge paıda tapty. Sonymen qatar Arqalyq qalasyndaǵy Rodına aýyldyq okrýginiń paıda túsimi - 2,9 mln teńge ǵana.
Erlan Spanov aıtqandaı, jergilikti ózin-ózi basqarýdyń rólin kúsheıtý kadr saıasatyna da baılanysty. Tıisinshe, jas mamandardy aýyldyq jerlerge tartý máselesi de tolyǵymen sheshilmeı keledi. Máselen, 11 aýyldyq okrýg apparatynda 18 bos oryn bar. Aýyl ákimderine jyl aıaǵyna deıin qajetti mamandardy tartý jumystary júktelgen.
