Qostanaı oblysyndaǵy aýylda órtten ana men bala qaza tapty

QOSTANAI. QazAqparat – Qostanaı oblysy Qusmuryn kentindegi jeke úılerdiń birinde 34 jastaǵy áıel alty jasar ulymen birge órttiń qurbany boldy. Olardyń máıitteri órt sóndirý kezinde tabyldy. Bul derekke TJD men oblystyq polıtsııa departamenti túsinikteme berdi, dep habarlaıdy QazAqparat tilshisi.

Qostanaı oblysy TJD baspasóz qyzmetiniń habarlaýynsha, órt sóndirýshiler 26 qańtar kúni saǵat 09:09-da shaqyrylǵan. Jeke turǵyn úı órtendi.

«Saǵat 09:17-de órt sóndirýshiler oqıǵa ornyna keldi. Qutqarýshylar 15 sharshy metrdi quraıtyn qonaq bólmedegi jıhazdyń barlyǵy janyp ketkenin anyqtady. Úıden gaz ballony shyǵaryldy. Órt saldarynan 34 jastaǵy áıel men onyń alty jasar uly qaza tapty», - dep habarlady TJD.

Órttiń shyǵý sebebi anyqtalyp jatyr. Qazirgi ýaqytta órt ornynda órt zerthanasynyń qyzmetkerleri jumys istep jatyr.

Bul fakti boıynsha polıtseıler máıitterdiń tabylýy boıynsha sotqa deıingi tergeý bastalǵanyn ǵana habarlady.