Qostanaı oblysyndaǵy aýylda nan qabyldaý pýnkti ashyldy
QOSTANAI. QazAqparat - Sarykól aýdanyndaǵy Tımırıazev aýylynda zamanaýı talaptarǵa jaýap beretin nan qabyldaý pýnkti ashyldy, dep habarlaıdy QazAqparat tilshisi.
Tımırıazev aýylynyń jer kólemi - 24 myń gektar. Mundaǵy 74 irili-usaq sharýa qojalyǵy mal ósirý, jem-shóp daıyndaýmen turaqty aınalysady. Solardyń biri - «Baıqońyrat» JShS Tuńǵysh Prezıdent kúni qarsańynda 40 myń tonna qýattylyqqa ıe zamanaýı nan qabyldaý pýnktin ashty.
Seriktestik basshysy Qarataı Ótemisevtiń aıtýynsha, jańa nysannyń quny - 60 mln teńge.
«Qambamyz óte kóp mólsherdegi astyqty qabyldaý men ony saqtaý múmkindigine ıe. Sonymen qatar, ony uzaqmerzimdik saqtaýdan keıin kondıtsııalyq jaǵdaıǵa jetkize alady. Sharýashylyqtyń on myń gektar egis alqaby bar. Ázirge 5 qoıma turaqty túrde jumys isteıdi. Pýnktke astyq jetkizý úshin avtokóliktermen qatar, temir joly tasymaly da paıdalanylady», - deıdi ol.
Nan qabyldaý pýnkti mańyna elektrondy tarazysy bar eki qabatty úı salyndy. Aldaǵy jyly tehnıkalardy qoıý úshin jabyq keshen salý josparda bar.
Munymen qosa «Baıqońyrat» JShS aǵash óńdeý jáne jıhaz tsehin ashyp, halyqqa qyzmet kórsetýde. Sondaı-aq, seriktestik maı shyǵaratyn shaǵyn zaýytty da basqarady. Bul ıtalııalyq óndiris nysany biraz jyldan beri óz ıgiligin kórsetip keledi. Aldyńǵy jyly qalpyna keltirilip, qaıtadan iske qosyldy.
