Qostanaı oblysyndaǵy ákimdik qyzmetkerleri balalar lagerinde turyp, aqy tólemegen
QOSTANAI. QazAqparat - Qostanaı oblysynda aýyl ákimdikteriniń birinde ákim apparaty qyzmetkerleri balalar lagerinde ýaqytsha turyp, ony jaldaý aqysyn jarty jylǵa jýyq ýaqyt tólemegen, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqtyń aldyn alý basqarmasynan atap ótkendeı, mundaı faktiler qoǵamdyq baqylaý kartasynyń aıasynda júrgizilip otyrǵan jumys barysynda anyqtalýda.
«2018 jyldyń 2 qarashasynda QR Memleketik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysyndaǵy departamentine Denısov aýdanyndaǵy Denısovskoe aýylynyń turǵynynan «Denısov aýdany ákiminiń apparaty» MM laýazymdy tulǵalarynyń sol aýylda ornalasqan «Solnechnyı» balalar lagerinde turyp, 2018 jylǵy sáýir-qazan aılary aralyǵynda onyń jaldaý aqysyn tólemegeni týraly aqparat kelip tústi», - dep habarlady vedomstvodan.
Ákim apparaty laýazymdy tulǵalarynyń «Solnechnyı» balalar lagerinde qyzmettik baspanalarynda jóndeý jumystary júrgizilgen kezde turǵany anyqtaldy.
«Departamenttiń aralasýynan keıin, ıaǵnı 2018 jylǵy 6 qarashada aýdan ákimi apparatynyń laýazymdy tulǵalary baspanany jaldaǵany úshin 335 400 teńge kólemindegi somany tólegen», - dep túsindirdi departamentte.
Osyǵan baılanysty, departament Qostanaı oblysyndaǵy memqyzmetkerlerdiń zańǵa qaıshy áreketteri týraly habarlaýǵa bolatyn senim telefony 8 (714-2) 393-165, WhatsApp messendjeriniń nómiri 8-707-602-14-24, sondaı-aq agskos@mail.ru elektrondyq poshtasy jumys isteıtinin eske salady.
