Qostanaı oblysyndaǵy aqbókenderdi sheteldik ǵalymdar zerttep jatyr
ASTANA.QazAqparat - Germanııa jáne Ulybrıtanııanyń ǵalymdary Qostanaı oblysyndaǵy «Altyn dala» tabıǵı rezervatyndaǵy aqbóken tóline zertteý júrgizdi. Atalmysh shara 2015 jylǵy janýarlardyń pasterellezden jappaı qyrylýyna baılanysty jasaldy, dep habarlaıdy alau.kz.
Qazaqstandyq jáne sheteldik ǵalymdar bul aýrý bakterııasynyń qaýipti satyǵa ótýiniń sebebin anyqtaýǵa tyrysty. Koroldik mal dárigerlik kolledjiniń professory Rıchard Kok 2015 jyly 200 myńǵa jýyq bóken qyrylǵan kezde Qazaqstanǵa kelgen bolatyn. Onyń paıymdaýynsha, bókenderdegi zalalsyz bakterııalar qorshaǵan ortanyń jylýyna baılanysty óltirgish patogenderge aýysqan.
«Kez kelgen bakterııa ylǵaldylyqty unatady. Ylǵaldy klımatta olar birden ósip shyǵa keledi. Qazaqstannyń aýa raıy negizi qurǵaq, alaıda ylǵaldylyq shamadan tys joǵarylaǵanda keri áserin tıgizýi múmkin», - deıdi Rıchard Kok.
Professordyń aıtýynsha, aýa raıy qazaqstandyq bókenderdiń tutastaı joıylýyna alyp kelýi ábden múmkin. Frankfýrt zoologııalyq qoǵamynan kelgen onyń áriptesi Shteffen Tsýter de zertteýshiler tobynyń quramynda. Olar mamyr aıynyń basynan bastap, qazirgi ýaqytta eń kóp bókender popýlıatsııasy mekendeıtin Batys Qazaqstan oblysynda jumys júrgizip jatyr. Ondaǵy oraldyq bókenderdiń sany 70 myńnan asady.
Alaıda, bıylǵy jyly tabıǵı rezervatqa 2 myńǵa jýyq bóken kelgendikten, ǵalymdar zertteý jumystaryn aıaǵyna deıin jetkize alǵan joq.
