Qostanaı oblysyndaǵy 155 qoqys polıgony talapqa saı emes
QOSTANAI. QazAqparat – Qostanaı oblysynda qorshaǵan ortaǵa zııandy qoqys polıgondary anyqtaldy. Bul týraly ákimdikte ótken keńeıtilgen jıynda oblys basshysynyń orynbasary Sergeı Karplıýk baıandady, dep habarlaıdy QazAqparat.
Qostanaı oblysynda orta eseppen jylyna 250 myń tonna turmystyq qatty qaldyq qoqys polıgondaryna tógiledi. Jyl basyndaǵy esep boıynsha óńirde qaldyq tógiletin 266 alań bar, onyń 111-i ǵana zańdy jumys istep tur. Qalǵany talapqa saı emes.
«Qoqys alańdaryn qalypqa keltirý, olqylyqtardy joıý máselesi únemi nazarymyzda. Byltyr 40 aýyldyq okrýgti ońtaılandyrý-biriktirý nátıjesinde qoqys polıgondarynyń sany 306-dan 266-ǵa qysqardy. 2019 jyly 22 polıgondy sanıtarlyq-epıdemıologııalyq talapqa sáıkestendirý jóninen jumystar júrgizildi. Oǵan 12,5 mln teńge jumsaldy. 266 qoqys polıgonynyń 75-iniń qorshaǵan ortaǵa shyǵarý ruqsaty joq. Ekologııalyq joba men saraptama ótkizýge ortasha 3 aı ýaqyt qajet. Sol sebepti, atalǵan aýdandardyń ákimdikteri qoqys polıgony ıelerimen birlesip, aldaǵy 10 shildege deıin jaǵdaıdy retteýi kerek», – dedi S.Karplıýk.
Oblysta «Ǵarysh Sapary» AQ ruqsat etilmegen qoqysqa monıtorıng júrgizý maqsatynda ǵaryshtan túsirilim jasap keledi. Tek byltyr Qostanaı, Rýdnyı qalalar men Altynsarın, Qostanaı, Fedorov, Meńdiqara, B.Maılın aýdandarynda ruqsat etilmegen 313 qoqys polıgony tirkeldi. Atalǵan óńirlerdiń jergilikti ákimdikterine eskertý jasalǵanmen, tek 155-i ǵana joıylǵan. Oblystyq ekologııa departamenti Qostanaı, Rýdnyı qalalary men 26 aýyldyq okrýg ákimdiginiń laýazymdy tulǵalaryn jaýapqa tartqan.
Qazir aımaqta qaldyq zattardy qaıta óńdeýmen aınalysatyn 6 kásiporyn bar. Olar onnan asa daıyn ónim shyǵaryp keledi.
