Qostanaı oblysynda jyl sońyna deıin úsh mektep salynady
QOSTANAI. QazAqparat – Óńirlik kommýnıkatsııalar alańynda ótken brıfıngte oblys ákimi Arhımed Muhambetov bilim berý ınfraqurylymyn damytý jóninde jan-jaqty baıandady, dep habarlaıdy QazAqparat.
Qostanaı oblysynda jańa mektepterdiń qurylysy jalǵasýda. Buǵan qosa 131 bilim berý nysany kúrdeli jáne aǵymdaǵy jóndeýden ótedi. Bul maqsatta 9,2 mlrd teńge bólindi. Qazirgi ýaqytta 91 mekteptegi jóndeý jumystary aıaqtalyp qaldy.
«Osy jyldyń qyrkúıek aıynda Áýlıekól aýdanynyń Amanqaraǵaı kentinde 320 oryndyq memlekettik tilde oqytatyn jańa mektep óz esigin ashady. Sondaı-aq, osy jyldyń sońyna deıin Qostanaı qalasynyń «ıÝbıleınyı» shaǵynaýdanynda 1200 oryndyq mekteptiń jáne Qarasý aýdany Qarasý aýylynda 320 orynǵa arnalǵan mekteptiń qurylysy aıaqtalady. Qalǵan jóndeý jumystary 1 qyrkúıekten keıin josparly túrde jalǵasady. Máselen, Qostanaı qalasynyń №6, 4, 19 mektepteri, Meńdiqara aýdanynyń Mıhaılov, Áýlıekól aýdanynyń Sulýkól orta mektepteri qalypqa keledi. Osyǵan baılanysty qalalar men aýdandardyń ákimdikteri oqýshylardy jaqyn ornalasqan mektepterge qaıta bólý nemese qashyqtan oqytýdy jalǵastyrýdy mindetine alady», - dedi aımaq ákimi.
Óńirdiń bilim berý uıymdaryn beınebaqylaý júıelerimen jabdyqtaý jumystary aıaqtaldy. Oǵan oblystyq bıýdjetten 187 mln teńge baǵyttaldy. Qazir 460 mektepke beınebaqylaý kameralary qoıyldy.
Aıta keteıik, Arhımed Muhambetov Qostanaı oblysynda stýdentterge arnalǵan eki jataqhananyń qurylysy bastalǵanyn málim etken bolatyn.
