Qostanaı oblysynda jyl sońyna deıin ótetin mańyzdy sharalar

QOSTANAI. QazAqparat – Qostanaı oblysynda buqaralyq is-sharalar endigide azamattardyń áleýmettik-ekonomıkalyq, turmystyq jaǵdaıyn jaqsartýǵa baǵyttalatyn bolady. Bul taqyryp oblys ákimdiginde ótken selektorlyq jıynda talqylandy, dep habarlaıdy QazAqparat.

Oblys ákiminiń orynbasary Marat Júndibaevtiń aıtýynsha, jyl saıyn aýqymdy merekeler bir sarynda uıymdastyrylyp keledi. Aldaǵy ýaqytta mundaı sharalar azamattardyń áleýmettik-ekonomıkalyq, turmystyq jaǵdaıyn jaqsartýǵa baǵyttalady.

«Túrli sala úzdikterin marapattaýmen qatar, patrıottyq mańyzy bar jıyndardy kóbirek uıymdastyrý kerek. Jańa óndiris nysandaryn ashý, baspana tapsyrý saltanaty, ınfraqurylymdy jaqsartý qatarly sharalar kórinis tabýy tıis. Mysaly, 22 qarashada Zarechnyı aýylynda dárigerlerge 20 páterdiń kiltterin tapsyrý jáne oblystyq jedel medıtsınalyq ortalyqqa zamanaýı quraldarmen jabdyqtalǵan 5 reanımobıl berý sharalary ótedi. Fedorov aýdanynyń Taza-Shandaq eldi mekeninde «Turar» JShS-men memlekettik-jekemenshik seriktestik aıasynda qaıta salynǵan ambýlatorııalyq pýnktiń ashylý saltanaty uıymdastyrylmaq. Tuńǵysh Prezıdent kúni qarsańynda Beıimbet Maılın aýdanynyń Novoılınov, Jitiqara aýdanynyń Zabelov, Sarykól aýdanynyń Zlatoýst jáne Arqalyq qalasynyń Vostochnyı eldi mekenderinde sý qubyrlaryn iske qosý sharalary ótkeli otyr. 5300-den astam turǵyn taza tirshilik nárimen qamtylady. Al Denısov aýdanynyń Nekrasov aýylynda 2 myń adamdy kógildir otynmen qamtıtyn gaz qubyry iske qosylady», - dedi oblys ákiminiń orynbasary.

Taǵy bir jańalyq – Táýelsizdik merekesi qarsańynda bilim basqarmasyna qarasty 50 jatyn oryndyq beıimdeý ortalyǵy ashylǵaly otyr. Onda qataryna ilese almaǵan balalardyń damýyna jáne psıhologııalyq-pedagogıkalyq jaǵynan qoldaý kórsetiledi. Bir ereksheligi, ondaǵy tájirıbeli mamandarmen qatar ata-analarǵa da ortalyqqa jumysqa ornalasýyna bolady.

Al bıylǵy Jastar jylynyń qorytyndy jıyny Tuńǵysh Prezıdent kúnine oraı ótkizilmekshi. Onda barlyq salada jetistikke jetken oblys jastary shaqyrylyp, óńirdiń «Altyn kitabyna» engizilgenderdi qurmetteý josparlanýda. Qarasha aıynyń sońynda jyl saıynǵy «Trıýmf» jeńimpazdaryna arnalǵan saltanatty jıyn ótedi. Oǵan halyqaralyq, respýblıkalyq olımpıadalarda jáne sporttyq saıystarda jeńimpaz bolǵan 140 júldeger men olardyń tálimgerleri shaqyrylmaq.