Qostanaı oblysynda jyl aıaǵyna deıin 25 aýylǵa aýyzsý jelisi tartylady

QOSTANAI. QazAqparat – Qostanaı oblysy óńirlik kommýnıkatsııalar qyzmetiniń alańynda aýyl turǵyndarynyń sapaly aýyzsýǵa qoljetimdiligi boıynsha brıfıng ótkizildi, dep habarlaıdy QazAqparat tilshisi.

Oblys ákimdiginiń Energetıka jáne turǵyn úı-kommýnaldyq sharýashylyq basqarmasynyń basshysy Dáýren Asqarovtyń aıtýynsha, halyqty sapaly aýyzsýmen qamtamasyz etý – atqarýshy bıliktiń basym mindetterdiń biri. Jalpy Qostanaı oblysy boıynsha 520 aýyl bar, onyń ishinde 174 aýyl ortalyqtandyrylǵan sýmen jabdyqtalǵan.

«2020 jyly «Nurly jer» memlekettik baǵdarlamasy jáne Jumyspen qamtý jol kartasy sheńberinde aýyldardy sýmen jabdyqtaý boıynsha 37 joba iske asyrylýda. Bul maqsatta 9,6 mlrd.teńge bólinip, qazir onyń 7,85 mlrd teńgesi ıgerildi. Jyl aıaǵyna deıin 25 aýyldy sapaly sýmen qamtamasyz etý josparlanýda. Keleshekte 69 aýyldy sapaly sýmen qamtamasyz etý jospary bar. Bul jobalarymyz iske assa, aýyl halqynyń 82%-y sapaly aýyzsýǵa qosylýǵa múmkindik alady», - deıdi basqarma basshysy.

Buǵan deıin óńirlerdi damytý baǵdarlamasy aıasynda B. Maılın aýdanynyń Novoılınovka, Jitiqara aýdanynyń Zabelovka, Arqalyq qalasynyń Vostochnoe, Sarykól aýdanynyń Zlatoýst aýyldary ortalyqtandyrylǵan sýmen jabdyqtaý júıesine alǵash ret qosyldy.