Qostanaı oblysynda júzdegen otbasy tegin azyq-túlik sebetin aldy
El aýmaǵynda engizilgen tótenshe jaǵdaıda áleýmettik jaǵynan az qamtylǵan azamattarǵa kómek kórsetý maqsatynda Elbasy Nursultan Nazarbaevtyń bastamasymen «Birgemiz» qoǵamdyq qory qurylǵan edi. Maqsaty – qazirgideı qıyn jaǵdaıda asa muqtaj jandarǵa materıaldyq turǵyda kómek kórsetý. Aktsııa aıasynda Qostanaı oblysynda birneshe otbasyna tegin azyq-túlik jıyntyǵy jetkizildi. Kómek alǵandardyń biri – Qostanaı qalasynyń turǵyny Aına Ábilqasova.
«Qazirgideı qıyn sátte bizge úlken kómek kórsetip jatqan bılikke, «Nur Otan» partııasyna alǵysym sheksiz. Partııa ókilderi kelip, azyq-túlik jıyntyǵyn tapsyrdy. Qýanyp qaldyq. Aldaǵy ýaqytta memleket tarapynan kómek jalǵasa beretinin aıtty», - deıdi A.Ábilqasova.
Osyndaı kómek alǵandardyń arasynda Áýlıekól aýdanynyń turǵyny Nıkolaı Kotın de bar. Ol – birinshi toptaǵy múgedek.
«Memleket halyqty sanatyna qaraı bólmeıdi. Qoǵam aldynda bárimiz teńbiz. Karantın ýaqytynda maǵan azyq-túlik jıyntyǵyn bergen jergilikti atqarýshy bılikke rahmetimdi aıtamyn», - deıdi zeınetker.
Amangeldi aýdanynyń turǵyny Nurgúl Ábisheva da «Birgemiz» qoǵamdyq qoryna alǵys aıtady. Bes balanyń anasyna ataýly áleýmettik kómekten tys, qarjylaı qoldaý kórsetilip turady.
«Memleket biz sııaqty kópbalaly otbasylardy azyq-túlik jıyntyǵymen qamtamasyz etip jatyr. Jaqynda aqshalaı kómek berip ketti. Qazir joldasym karantınniń saldarynan ýaqytsha jumyssyz otyr Osyndaı qıyn sátte qorǵan bolǵan bılikke alǵystan basqa aıtarymyz joq», - dedi kópbalaly ana.
«Nur Otan» partııasynyń oblystyq fılıaly málimetine súıensek, óńirde júzdegen otbasy jergilikti ákimdikter usynǵan tizim boıynsha azyq-túlik jıyntyǵyn alyp jatyr. «Birgemiz Qostanai» qoǵamdyq qory arqyly 5681 otbasy 50 myń teńge kóleminde bir rettik tólem aldy.
«Prezıdent tapsyrmasy boıynsha tegin azyq-túlik jıyntyǵyn alatyn azamattardyń 4 sanaty bektildi. Birinshi sanat – ataýly áleýmettik kómek alatyn az qamtylǵan otbasylardyń 6 jastan 18 jasqa deıingi balalary. 2, 3, 4-sanat – karantındik aımaqta turatyn azamattar. 1 jáne 2-toptaǵy múgedek balalary bar otbasylar, múgedek balanyń kútimimen otyrǵan ata-analar da azyq-túlik alady», - delingen partııa fılıalynyń aqparatynda.
