Qostanaı oblysynda júkti áıel men jas bala qar qursaýynan qutqaryldy
QOSTANAI. QazAqparat - QR TJK Soltústik aımaqtyq aeromobıldi jedel qutqarý jasaǵynyń qutqarýshylary Qostanaı oblysy Qarasý aýdanyndaǵy Ýshakovo aýylynan 8 adamdy shyǵarý boıynsha qutqarý operatsııasyn ótkizdi. Olardyń arasynda soqyrishegin aldyrý úshin otaǵa muqtaj jas bala jáne júkti áıel bolǵan. Bul týraly «QazAqparat» HAA tilshisi Qostanaı oblysy TJD baspasóz qyzmetine silteme jasap habarlaıdy.
Bala men júkti áıeldi dereý aýrýhanaǵa jetkizý qajet edi, alaıda shalǵaıda jatqan Ýshakovo aýylynan shyǵý jolyn qar basyp qalǵan, dep atap ótti baspasóz qyzmeti. Adamdardy qutqarý operatsııasyna jasaqtyń 7 qyzmetkeri jumyldyryldy. Olar óz jumysyna múdirmeıtin avtomashına, qarda júretin kólik jáne júkti áıeldi tasymaldaý úshin «Gazel» kóligin qoldanǵan. QR TJK Soltústik aımaqtyq aeromobıldi jedel qutqarý jasaǵy basshysynyń orynbasary Sergeı Shmıdttiń aıtýynsha, qutqarý operatsııasy 15 saǵattan astam ýaqytqa sozylǵan.
«Shyǵaryp salýshylardy qosqanda, qutqarýshylar 8 adamdy kóshirdi, - delingen habarlamada. - Júkti áıel Áýlıekól aýylynyń aýrýhanasyna jetkizildi, al bala Qostanaı qalasyndaǵy oblystyq balalar aýrýhanasyna tústi. Der kezinde kómek kórsetilgendikten, adamdardyń ómiri men densaýlyǵyna esh qaýip joq».
Qys basynan beri qutqarýshylar qolaısyz aýa raıyna baılanysty Ýshakovo aýylynan 25 adamdy shyǵarǵan.
