Qostanaı oblysynda júk kólikteriniń soqtyǵysýynan júrgizýshiniń aıaǵyn julyp ketti
QOSTANAI. QazAqparat - Búgin Qostanaı oblysy Fedorov aýdanyndaǵy tasjolda eki KamAZ soǵysyp, bir júrgizýshi aıaǵynan aıyryldy, dep habarlaıdy «QazAqparat» HAA tilshisi.
Jan túrshigerlik apat Fedorov aýylynan tórt shaqyrym jerde oryn aldy, dep naqtylady Qostanaı oblystyq ІІD baspasóz qyzmetinen. Polıtseıler QR QK 345-baby (Adamnyń densaýlyǵyna aýyr zııan keltirý) boıynsha sotqa deıingi tergeý jumystaryn júrgizýde.
«Aldyn ala derek boıynsha, «KamAZ-65115» kóligindegi 23 jastaǵy júrgizýshi 37 jastaǵy azamattyń basqarýyndaǵy «KamAZ-5320» júk kóligimen soqtyǵysqan, - dep habarlady baspasóz qyzmetinen. - Alǵan jaraqaty saldarynan ekinshi kóliktegi júrgizýshiniń oń aıaǵyna ampýtatsııa jasalyp, ol Fedorov ortalyq aýdandyq aýrýhanasynyń jan saqtaý bólimine jatqyzyldy. Onyń 1982 jáne 1984 jylǵy eki jolaýshysy túrli jaraqattar aldy».
Polıtseıler oqıǵa syzbasyn qurdy, medıtsınalyq kýálandyrý júrgizildi. Eki júrgizýshi de mas bolmaǵan.
