Qostanaı oblysynda JOO-lardyń 1-kýrs stýdentteri shtattyq oqýǵa kóshedi

QOSTANAI.QazAqparat – Qostanaı oblysynyń memlekettik sanıtarııalyq bas dárigeri karantın sharalaryn jeńildetý týraly qaýlysyna ózgerister engizdi, dep habarlaıdy QazAqparat oblys ákimi janyndaǵy jedel shtabqa silteme jasap.

Qostanaı oblysynyń memlekettik sanıtarlyq bas dárigeri E. Dáýletbaev bilim salasyna qatysty ózgeristerdi jarııalady.

Jańa qaýlyǵa sáıkes 2020-2021 oqý jylynyń úshinshi toqsanynda kontıngenti 300-ge deıingi mektepter dástúrli oqý formatyna kóshedi. Bul rette synyptardaǵy balalar sany 15-ten aspaıdy jáne sabaq arasyndaǵy úzilisterde synyp ishi dezınfektsııalyq quraldarmen tazartylady.

«Ata-analardyń ótinishi boıynsha jalpy bilim beretin mektepterde 1-den 5-synyptarda, halyqaralyq mektepterde 7-synypta kezekshi toptar uıymdastyrylady. 9-11(12) synyp oqýshylary aptanyń 6 kúni ishinde aralas oqytý formatyna kóshedi. Pánderdiń 70%-y shtattyq rejımde, 30%-y qashyqtan oqytylady. Bilim berý mekemesi ákimshiliginiń sheshimi boıynsha sabaqtan tys ýaqytta 5 adamnan aspaıtyn toptarda oqýshylardy jeke oqytýǵa ruqsat beriledi. QR MMJT №67 qaýlysynyń talaptaryn saqtaı otyryp, bilim berý obektilerindegi qoǵamdyq tamaqtandyrý oryndary jumysyn jalǵastyrady», delingen sanıtarlyq dárigerdiń qaýlysynda.

Kolledjder men joǵary oqý oryndarynyń I kýrs stýdentteri ekinshi semestrden bastap shtattyq oqýǵa aýystyrylady.

Qostanaı oblysynyń memlekettik sanıtarlyq bas dárigeriniń qaýlysy 2021 jylǵy 10 aqpan saǵat 00:00-den bastap kúshine enedi.