Qostanaı oblysynda jolda qalǵan júzden astam adam qutqaryldy
QOSTANAI. QazAqparat – 11-12 naýryz kúni buzylǵan aýa raıynda jolǵa shyqqan júzden asa qostanaılyq dittegen jerine jete almaı qaldy. Qostanaı oblysynyń Tótenshe jaǵdaılar departamenti júrgizilgen qutqarý jumystary týraly aqparat berdi, dep habarlaıdy QazAqparat tilshisi.
Qostanaı oblysynyń birqatar aýdanynda qatty ekpindi jel soǵyp, jaýyn-shashyn mol tústi, saldarynan jol kórinbeı qalǵan.
«Bir táýlik ishinde qutqarýshylar 122 adamdy evakýatsııalaǵan, olardyń qatarynda jeti bala bar, 9 avtokólik joldyń taza betine shyǵaryldy. Atap aıtqanda, Qamysty, Sarykól, Naýyrzym jáne Jangeldi aýdandarynda, sonymen qatar Arqalyq pen Jitiqara qalalarynyń mańaıynda qutqarý jumystary júrgizildi», - dep habarlady vedomstvodan.
«Qutqarýshylar 04:50 men 11:45 aralyǵynda Arqalyq qalasy men Alýa aýylynyń arasynda 49 adam, 8 jeńil avtokólikti evakýatsııalaǵan. Sonymen qatar Naýyrzym aýdanynda Dámdi aýylynan 15 shaqyrym jerde 17 jeńil avtokólik pen bir júk kóligin evakýatsııalaǵan, kólikterde 50 adam bolǵan, olardyń jeteýi – bala.
Qutqarý operatsııalary sátti aıaqtaldy, eshkim medıtsınalyq kómekti qajet etpedi, zardap shekkender joq», - dedi vedomstvodan.
Qostanaı oblysynyń Tótenshe jaǵdaılar boıynsha departamenti azamattarǵa aýa raıynyń nasharlaýyna baılanysty eldi mekenderden alys ketip, ómirlerin qaterge tikpeýge keńes beredi.
