Qostanaı oblysynda jolda qalǵan 21 adam qutqaryldy - TJM

ASTANA. QazAqparat - Qostanaı oblysynyń aýmaǵynda 8 naýryzda kún raıynyń qolaısyzdyǵyna baılanysty eskertý jarııalanǵan edi. Osyǵan oraı tas joldarda avarııalyq-qutqarý operatsııalary júrgizilip, 21 adamǵa kómek kórsetildi, dep habarlaıdy QR TJM baspasóz qyzmeti.

2023 jylǵy 9 naýryz kúni 04:10-da Qarasý aýdanyndaǵy oblystyq mańyzy bar «Qarasý-Bolshaıa Chýrakovka» avtojolynyń jabyq ýchaskesiniń 10-shaqyrymynda TJD jeke quramynyń 2 adamy bar KÝNG arnaıy tehnıkasymen qar qursaýynan 2 jeńil avtokólik joldyń tazartylǵan ýchaskesine deıin súırep ákelindi. 6 adam qutqaryldy, onyń ishinde 3-eýi bala. Adamdarǵa medıtsınalyq kómek qajet bolmady.

Dál sol kúni saǵat 05:15-te Altynsarın aýdanynyń TJ bólimine Şerbakov aýylynan 5 shaqyrym jerde aýdandyq mańyzy bar avtojolda 12 jolaýshysy bar 4 avtokólik jolda turyp qalǵany týraly shuǵyl habarlama kelip tústi. Kóp uzamaı oqıǵa ornyna qutqarýshylar kelip, jolaýshylardy jol talǵamaıtyn ÝAZ kóligine tıedi. Qutqarylǵan azamattar Şerbakov orta mektebiniń jylytý pýnktine aman-esen jetkizildi.

2023 jylǵy 9 naýryzda saǵat 06:05-te Meńdiqara aýdanyndaǵy aýdandyq mańyzy bar avtojolda Kaskat aýylynan 7 shaqyrym qashyqtyqta TJD kúshterimen jergilikti atqarýshy organdarmen birlesip qar qursaýynan 3 adam qutqaryldy. Jolaýshylary bar jeńil avtokólikti joldyń tazartylǵan ýchaskesine súırep shyǵaryp, Lomonosov aýyldyq okrýginiń ákimdiginiń jylytý pýnktine alyp bardy.

Budan buryn 8 naýryz kúni saǵat 16:20-da Amangeldi aýdanynda ótimdiligi joǵary Nıva-BRONTO tehnıkasymen qutqarýshylar apatty elektr berý jelisiniń úzilý avarııasyn joıý maqsatynda Amangeldi AEJ qyzmetkerleri brıgadasyn jetkizý úshin Qarynsaldy aýylyna bardy.

Qostanaı oblysynyń TJD turǵyndarǵa aýa-raıy nasharlaǵan jaǵdaıda eldi mekenderinen tys jerlerge shyqpaýdy suraıdy.