Qostanaı oblysynda jolaýshy poıyzdarynyń júrý kestesi ózgerdi

QOSTANAI.QazAqparat – Qostanaı oblysynda jolaýshy poıyzdarynyń júrý ýaqytyna ózgerister endi. Karantındik sharalar kezindegi jol júrý kestesi týraly Óńirlik kommýnıkatsııalar qyzmetinde aıtyldy, dep habarlaıdy QazAqparat tilshisi.

Endi «Qostanaı-Almaty» baǵyty jup kúnderi, «Qostanaı-Qaraǵandy» baǵyty taq kúnderi qozǵalady.

«Atalmysh poıyzdarǵa aldyn ala resimdelgen bıletterdi qaıtarý tasymaldaý erejelerinde belgilengen merzimderde júrgiziledi. Bul rette jol júrý qunynyń somasy ustalmaıdy», - deıdi «QTJ-Júk tasymaly» Qostanaı» bólimshesi fılıalynyń dırektory Vıacheslav Mıronov.

Sonymen qatar «Qostanaı» bólimshesi boıynsha ótetin barlyq poıyzdar úshin aıaldamalar sany qysqartyldy. Atap aıtqanda, «Qostanaı-Almaty», №57/58 «Oral - Nur-Sultan», №621/622 «Qostanaı – Arqalyq», 327/328 «Qostanaı-Qaraǵandy», 47/48 «Atyraý - Nur-Sultan» baǵyttary kúndelikti júrmeıdi. Poıyz tek iri jáne poıyzdardy retke keltirý stantsııalarynda aıaldaıdy.