Qostanaı oblysynda jol jóndeýge 23 mlrd teńge bólindi
QOSTANAI. QazAqparat - 2019 jyly oblystyq, aýdandyq mańyzy bar avtomobıl joldaryn jáne kóshelerdi jóndeý jumystaryna 23,3 mlrd teńge bólindi. Bul týraly oblys ákimdiginde ótken apparat jıynynda oblystyq jolaýshylar kóligi jáne avtomobıl joldary basqarmasynyń basshysy Baqytbek Esenǵulov málim etti, dep habarlaıdy QazAqparat.
Bıyl bul qarajattyń 4 mlrd teńgesi 2018 jyly jóndeý jumystary bastalǵan 10 nysanǵa baǵyttalady. Qalǵan qarjy josparǵa saı ıgeriledi.
«Osy jyly jergilikti mańyzy bar joldardy ortasha jóndeý úshin 41 konkýrs ótkizildi, merdigerlik uıymdarmen kelisim-sharttar 30 ýchaske boıynsha jasaldy. 7,4 mlrd teńge ortasha jóndeý jumystaryna bólinedi. Qazirdiń ózinde Qamysty, Meńdiqara jáne Fedorov aýdandarynda jol jóndeý bastalyp ketti. Qalǵan aýdandarda merdigerlik uıymdardyń bekitilgen kestesine sáıkes júrgiziledi. Aǵymdaǵy jyldyń 24 mamyryndaǵy jaǵdaı boıynsha, bólingen 23,3 mlrd teńgeniń 7 paıyzy ǵana ıgerildi. Al bıýdjet qarajatyn ıgerýdi maýsym aıynan bastap teksere bastaımyz», - dedi B.Esenǵulov.
Eldi mekenderdiń kóshelerine jóndeý júrgizýge respýblıkalyq jáne oblystyq bıýdjetten 5,5 mlrd teńge bólingen. Al Rýdnyı qalasyndaǵy Volodarskıı kóshesi «Óńirlerdi damytý» baǵdarlamasy aıasynda qaıta jańartylatyn bolyp sheshildi. Sondaı-aq, «Aýyl - el besigi» jobasy sheńberinde 5 aýdan ortalyǵyndaǵy 19 kóshe jańa keıipke enedi. Bul maqsatqa 649,1 mln teńge qarastyrylǵan.
Oblys ákimi Arhımed Muhambetov aýdan ákimderine aýdan ortalyqtarynyń kóshe jelisin damytý boıynsha 3 jyldyq jospar qurýdy tapsyrdy. Bul máseleni oblystyq jolaýshylar kóligi jáne avtomobıl joldary basqarmasy baqylaýda ustaıdy.
