Qostanaı oblysynda jol jóndeýge 1,2 mlrd teńge bólindi

QOSTANAI.QazAqparat – Qostanaı oblysynda oblystyq mańyzy bar joldardy jóndeýge 1,2 mlrd teńge bólindi, dep habarlaıdy QazAqparat oblys ákimdiginiń ekonomıka jáne bıýdjettik josparlaý basqarmasynyń basshysy Gúlbaram Musaǵazınaǵa silteme jasap.

Basqarma basshysynyń aıtýynsha, 2020 jylǵy bıýdjettiń kiris bóligin asyra oryndaý nátıjesinde oblystyq bıýdjet qaıta bólindi. Jolaýshylar kóligi jáne avtomobıl joldary basqarmasyna 1, 2 mlrd teńge berilmek.

«Bul qarjy Amangeldi, Denısov, Jangeldın, Qarabalyq, Naýyrzym aýdandaryndaǵy avtomobıl joldaryn ortasha jóndeýge baǵyttalady. Bıýdjetten ıgerilmeı qalǵan 464 mln teńgeni Energetıka jáne turǵyn úı-kommýnaldyq sharýashylyq basqarmasy alady. Onyń 159,2 mln teńgesi Abaı jáne Mırolıýbov aýyldary arasynda ornalasqan Uzynkól magıstraldy sý qubyryn qaıta jańartýǵa bólinedi», - deıdi G.Musaǵazına.

Oblystyq jolaýshylar kóligi jáne avtomobıl joldary basqarmasy málim etkendeı, 2020-2021 jyldary jol ınfraqurylymy sheńberinde 281 joba júzege asyrylady. Onyń ishinde «Nurly jol» baǵdarlamasy boıynsha – 18,5 mlrd teńge, «Jumyspen qamtýdyń jol kartasy» aıasynda – 20,3 mlrd teńge, «Aýyl-El besigi» arnaıy jobasy men jergilikti bıýdjetten 6,1 mlrd teńge qarastyrylǵan.

2020 jyly 500 shaqyrymnan astam jol jóndelgen. «Nurly jol» baǵdarlamasy aıasynda 4982 adam jumysqa ornalastyryldy, onyń ishinde jumyspen qamtý ortalyqtary arqyly 2491 adam alyndy.

Jóndeý jumystaryn ýaqytyly jáne sapaly júrgizý úshin qala jáne aýdan ákimderi merdigerlik uıymdarmen birlesip jumys júrgizýdiń kúntizbelik kestelerin ázirledi.