Qostanaı oblysynda joǵalǵan baqtashy óli kúıinde tabyldy
ASTANA. QazAqparat - Qostanaı oblysynda qutqarýshylar úsip qalǵan er adamnyń denesin tapty, dep habarlaıdy QazAqparat Soltústik óńirlik aeromobıldi shuǵyl-qutqarý jasaǵyna silteme jasap.
Belgili bolǵandaı, baqtashy 31 jeltoqsan kúni joǵalǵan. «Aqparat túsisimen, baqtashyny izdestirý jumystary bastaldy. 250 sharshy shaqyrymnan astam aýmaq tekserildi. Jarty kúnnen keıin ózen saılarynyń birinen onyń aty tabyldy. Janýardyń júgeni qarǵa qatyp qalǵan», - dep habarlady jasaqtan.
Attan 100 metr jerdegi butalardyń arasynda, qardyń astynan er adamnyń máıiti tabyldy.
2016 jyldyń sońy men 2017 jyldyń basy qutqarýshylar úshin aýyr boldy. Qostanaı oblysynda mamandar jol ústinde qıyndyqtarǵa tap bolǵan ondaǵan adamdy qutqardy. Soltústik óńirlik aeromobıldi shuǵyl-qutqarý jasaǵynyń kezekshi bólimi Ýdarnık kenti mańynda ishinde eresekter men balalar bolǵan kólikti qutqardy. Barlyǵy - 10 adam, bári din-aman.
Sondaı-aq 3 qańtarǵa qaraǵan túni TREKOL avtokóligimen Ýshakov kentinen Áýlıekól aýdan ortalyǵyna shuǵyl túrde medıtsınalyq kómekti qajet etken júkti áıel jetkizildi.
