Qostanaı oblysynda jerdiń bólinýin memlekettik ınspektorlar baqylaıdy
ASTANA. QazAqparat - Qostanaı oblysynda aýylsharýashylyq jerlerin bólýdi endi memlekettik ınspektorlar baqylaýǵa alady, dep jazady alau.kz.
Qostanaı oblysynda sońǵy eki jylda 16 myń gektar jer memlekettik qorǵǵa qaıtarylǵan, bul eldegi eń joǵary kórsetkishterdiń biri. Jyl sońyna qaraı bul kórsetkish taǵy da artýy múmkin.
Qazir oblysta mal baǵatyn jaıylymdar azaıyp ketken. Sońǵy úsh jylda oblystyq jerdi paıdalaný jáne qorǵaýdy baqylaý basqarmasy 332 myń gektar jerge baqylaý ornatqan. Resmı derek boıynsha, 60 jer paıdalanýshy bar.
«Bul aýmaqtardyń basym bóligi - jaıylym, 70 myń gektary - jyrtylǵan jer. Oblys boıynsha jaǵdaı osy. Naýyrzym, Qarabalyq, Taran aýdandarynda jer paıdalanýshylar óte kóp, olardyń ishinde qaskóıler de bar. «Bereke-astyq» JShS-tan kóp zııan keldi, biz olardy izdep jatyrmyz», - deıdi Qostanaı oblystyq jerdi paıdalaný jáne qorǵaýdy baqylaý basqarmasynyń bólim basshysy Ásel Tabergenova.
Onyń aıtýynsha, budan bylaı aýylsharýashylyq jerlerin bólýdi endi memlekettik ınspektorlar baqylaýǵa alady.
«Endi jerdiń bólinýin memlekettik ınspektorlar baqylaıdy. Bul fýnktsııalardy kim atqaratynyn aýdan ákimi sheshedi. Kóktemgi egis naýqany aıaqtalysymen aýdan ákimine baǵynatyn memlekettik ınspektorlar tekserýge shyǵýy tıis», - deıdi ol.
Resmı derekter boıynsha, Qostanaı oblysynda jaıylymnyń aýmaǵy 12 mln gektardy quraıdy, bul óńir aýmaǵynyń 67%-i degen sóz. Sarapshylar jer ınspektorlary óńirdegi jer bólinisin retke keltiredi dep senip otyr.
