Qostanaı oblysynda jem-shóptiń baǵasy sharyqtap tur
QOSTANAI. QazAqparat – Qostanaı oblysynda bir tonna shóptiń baǵasy 30 myń teńgege deıin barady. Munyń sebebin oblystyq aýyl sharýashylyǵy jáne jer qatynastary basqarmasynyń basshysy Jansultan Táýkenov túsindirip berdi, dep habarlaıdy QazAqparat.
Ótken jyldarmen salystyrǵanda bıyl oblysta shóptiń shyǵymy tym tómen. Kóktegenderiniń ózi aptap ystyqta sarǵaıyp, kúıip ketken. Tıisinshe jem-shóptiń baǵasy sharyqtap ketken. Keıbir aýdandarda onyń tonnasy 30 myń teńgege deıin barady.
«Óńirlerde shóp baǵasy árqıly. Mysaly, Naýyrzym aýdanynda 1 tonna shóp 15 myń teńgege baǵalanyp otyr. Al Fedorov, Sarykól aýdandarynda 16-18 myń teńge kóleminde. Bir sózben aıtqanda, oblys boıynsha shóp baǵasy jıyrma myń teńgeniń aınalasynda turaqtamaq. Shabyndyq jeri mol, shóbi shúıgin Amankeldi, Jankeldın aýdandarynda bir tonna shóp 7,5 myń teńge. Al mal azyǵynan tarshylyq kórip otyrǵan Jitiqara men Qamysty aýdandarynda baǵa 30 myń teńgege deıin barady. Bul ótken jylǵy deńgeıden joǵary. 2018 jyly turǵyndar shóptiń 1 tonnasy úshin 15-16 myń teńge tólegen. Buǵan árıne, bıylǵy qurǵaqshylyq basty sebep. Ekinshiden, baǵanyń bulaı qubylýyna dızeldik otynnyń qymbattaýy áser etip otyr. Ótken jyly dızel otynynyń 1 lıtri 172 teńge bolsa, ústimizdegi jyly ol 187 teńgege jetti. Onyń ústine tehnıkanyń, qosalqy bólshekterdiń baǵasy qymbattady», - deıdi Jansultan Táýkenov.
Jalpy, búginde oblys boıynsha 980 myń tonna shóp daıyndaldy. Al shabyndyqtaǵy shóptiń shyǵymy ár aýdanda ártúrli. Birqatar aýdandarda gektaryna 1,5-3,5 tsentnerden aınalady. Máselen, Qamysty, Jitiqara, Qarabalyq, Denısov, Naýyrzym, Áýlıekól, Beıimbet Maılın aýdandaryndaǵy kórsetkish jalpy oblystyq nátıjege saıady. Qostanaı, Arqalyq qalasy, Sarykól, Fedorov, Altynsarın, Meńdiqara aýdandarynda bir gektardyń túsimi – 4,4-6,4 tsentner.
Jansultan Táýkenovtiń aıtýynsha, Amankeldi aýdany, Jankeldın, Qarasý aýdandarynda mal azyǵy jınalyp, qystaq bastaryna tasymaldanǵan. Basqarma basshysy aýdan ákimdikterine qajetti mal azyǵyn daıyndaý barysynda barlyq qajetti sharalardy qarastyrý týraly usynys aıtty.
«Shóp baǵasynyń artýy, mal basynyń tómendeýi tárizdi áleýmettik shıeleniske jol bermeý, jeke sharýa qojalyqtaryna, iri aýylsharýashylyq taýaróndirýshilerine turǵyndardy shópti arzan baǵamen satýdy erekshe nazar aýdarý mindetteldi», - dedi J.Táýkenov.
Buǵan deıin óńirdegi qurǵaqshylyq saldarynan dándi-daqyldardyń shyǵymy tómendep ketkenin habarlaǵan edik. Ásirese, oblystyń ońtústik aýdandaryndaǵy eginniń túsimine áser etken.
