Qostanaı oblysynda jataqhanada qalǵan stýdentterge ystyq tamaq beriledi

QOSTANAI. QazAqparat – Elimizde tótenshe jaǵdaıdyń engizilýine baılanysty úıine bara almaı, jataqhanada qalǵan stýdentterge barynsha kómek kórsetiledi. Bul týraly brıfıngide oblystyq bilim basqarmasynyń basshysy Vasılıı Tsymbalıýk málim etti, dep habarlaıdy QazAqparat.

Oblysta tehnıkalyq jáne kásiptik bilim berý uıymdarynyń 25 jataqhanasy jumys isteıdi. Olarda 2 569 stýdent turady. Budan ózge joǵarǵy oqý oryndaryna tıesili 14 jataqhananyń stýdentteri úılerine jiberildi.

«Halyqty koronavırýstyq ınfektsııadan qorǵaý boıynsha sharalardy kúsheıtý maqsatynda Qostanaı oblysynyń bilim basqarmasy balalar men pedagogterdiń qaýipsizdigin qamtamasyz etý boıynsha qajetti jumystardy júrgizýde. Qazirgi ýaqytta tehnıkalyq jáne kásiptik bilim berý uıymdarynyń 11 jataqhanasynda 71 stýdent qaldy. Olardyń 45-i – ata-anasynyń qamqorlyǵynsyz qalǵandar. Jataqhanada qalǵan stýdentterge ystyq tamaq uıymdastyrylyp, áleýmettik osal toptardan shyqqan stýdentterge aqshalaı ótemaqy kartadaǵy shottaryna aýdarylady», - dedi basqarma basshysy.

16 naýryzdan bastap óńirdiń 498 mektebindegi oqýshylar tolyǵymen demalysqa jiberdi. Olardyń jyl saıynǵy saıahat jumystary keıinge shegerildi. Jalpy bilim beretin pánder boıynsha oqýshylardyń respýblıkalyq olımpıadasyn, Ulttyq zııatkerlik baıqaýyn ótkizý merzimi aýystyryldy. Pedagogterdiń biliktiligin arttyrý kýrstary onlaın formatta ótkiziledi. Kýrstardyń bir bóligi osy jyldyń ekinshi jartyjyldyǵyna aýystyrylady.