Qostanaı oblysynda jasyl tehnologııalar zerthanasy ashyldy
Atalǵan zerthana Ybyraı Altynsarın atyndaǵy daryndy balalarǵa arnalǵan mektep-ınternatynyń bazasynda ashyldy. Zerthananyń basty jańalyǵy - onda ósimdikterdi topyraqsyz ósirý ádisi qolǵa alynady. Nátıjesinde, oqýshylardyń ǵylymı-zertteý jobalarymen aınalysýǵa tolyqtaı múmkindikteri bar.
«Bul zerthana ósimdikterdi gıdroponıka ádisimen ósirýge jáne olardyń ósýin baqylaýǵa arnalǵan. Gıdroponıka - ósimdikti topyraqsyz ósirý ádisi. Bul degenińiz, ósimdiktiń qorektenýge qajetti barlyq zattar sýdan nemese arnaıy ertindiden alynady. Onyń naqty mólsheri bolady. Sol sebepti, topyraqtyń qajeti joq. Esesine kompressorlardyń kómegimen sý ottegimen baıytylady. Bul ádis ósimdikterdiń barlyq túrleri men suryptaryn, aýyl sharýashylyǵy daqyldaryn, tipti tsıtrýs jáne tropıkalyq ósimdikterdi ósirýge múmkindik beredi. Ádistiń tıimdiligi - ósimdik barlyq qajetti qorektik zattaryn sýdan jáne onyń quramyndaǵy ottegiden alyp, jemisti daqyldardyń ónimdiligin arttyrady, dekoratıvti ósimdikterdiń gúldenýin uzartady, ósimdikter topyraqta bolatyn adam aǵzasyna zııandy elementterdi jınamaıdy, únemi sýarýdy qajet etpeıdi», - dep túsindirdi mekteptiń hımııa jáne bıologııa pániniń muǵalimi Almagúl Imanqulova.
Gıdroponıka ádisi ekzotıkalyq-tropıkalyq jemisterdi ósirýge múmkindik beredi. Bul ádisti qoldaný topyraqta ósetin ósimdikterde kezdesetin zııankester men túrli aýrýlardan saqtaıdy.
Jalpy, jasyl tehnologııalar zerthanasyn ashýǵa 5 mln teńge jumsalǵan.