Qostanaı oblysynda jańa traktor tsehy iske qosyldy
QOSTANAI. QazAqparat - «Agromashholdıng KZ» AQ Qostanaı oblysynda qytaılyq «Lovol» kompanııasynyń seriktesterimen birge traktor shyǵaratyn tseh ashty, dep habarlaıdy QazAqparat.
Bul óndiris orny ótken jyly jumys isteı bastaǵan edi. Joba quny - 3,6 mlrd teńge. Al osy jyldyń alǵashqy toqsanynda konveıerden shyqqan alǵashqy 28 traktor birden satylyp ketti. Búginge deıin kásiporyn 100 shaqty traktor qurastyrǵan.
«Búgin oblys úshin mańyzdy oqıǵa. Biz óńirde aýylsharýashylyq tehnıkalaryn qurastyrý salasyn damytý sheńberinde qytaılyq áriptesterimizben birlesip, jańa óndiris oshaǵyn ashyp otyrmyz. 130 attyń kúshine teń traktorlar oblysta ǵana emes, elimizde úlken suranysqa ıe. Aldaǵy ýaqytta kásiporyn óz ónimderin ishki naryqpen qosa, kórshi memleketterge de eksporttaýdy josparlap otyr», - dedi oblys ákimi Arhımed Muhambetov jańa jobanyń ashylý saltanatynda.
Aýyl sharýashylyǵy tehnıkasyn shyǵarý - «Agromashholdıng KZ» AQ pen qytaılyq «ShandongLovolHeavyIndustryInternationalTradingCO. LTD» birlesken jobasy. «Lovol» - dúnıejúzindegi aýylsharýashylyq tehnıkalaryn shyǵarýmen aınalysatyn jetekshi kompanııalardyń biri. Ol jyl saıyn 70 myń traktor, 50 myń kombaın, basqa da tehnıkalardy qurastyrady. Kompanııa óz ónimderin Qytaıda ǵana emes, álemniń 50 eline eksporttaıdy.
Aldaǵy ýaqytta «Agromashholdıng KZ» AQ bazasynda 4,5 myń sharshy metrlik tseh iske qosylmaq. Onda jylyna 3000 traktorǵa deıin shyǵarylady. Jańa joba 180 adamdy turaqty jumyspen qamtıtyn bolady.
Keleshekte traktordyń keıbir bólshekterin zaýyt óz ishinde jasaıdy. Bul mashına qurastyrýda úlken jetistik. Óndiristiń kerme jibin qııarda «Shandong Lovol Heavy Industry International Trading CO., LTD» basqarma tóraǵasy Van Gýı Mın qazaqstandyq áriptesterine alǵys bildirdi.
«Búgingi birlesken jobany ashý qurmetine ıe bolǵanyma asa qýanyshtymyn. Óz kezeginde «KazAgroFınans» AQ, «BRK-Lızıng AQ, Qazaqstan Úkimeti men Qostanaı oblysynyń basshylaryna alǵys aıtamyn. Biz «Agromashholdıng KZ» AQ birlesip, kómek jumys atqardyq»,-dedi ol.
Aıta keteıik, búgin Qostanaıda Qazaqstan men Reseı jastarynyń yntymaqtastyq forýmy bastaldy.
