Qostanaı oblysynda jańa qalaǵa qandaı ataý berilmek
QOSTANAI. QazAqparat - Qostanaı aýdanynyń ortalyǵy Zatobol aýyly qalaǵa aınalýy múmkin, dep habarlaıdy «QazAqparat» HAA tilshisi
Osyǵan deıin habarlaǵanymyzdaı, Zatobol aýyly qala mártebesine usynylady. Bul týraly oblystyq máslıhattyń kezekten tys sessııasynda aıtyldy.
«Ózderińizge belgili, Qostanaı oblysynda tórt qala bar. Olar: Qostanaı, Rýdnyı, Lısakov jáne Arqalyq. Al Jitiqaranyń aýmaǵy keń bolǵanymen, ol resmı túrde qala mártebesine ıe emes. Qostanaı aýdanynyń ortalyǵy Zatobol aýylynda 25 myń adam turady. Degenmen, bul 10 jyl burynǵy sanaqtaǵy málimet. Kelesi jyly taǵy da sanaq júredi. Buǵan qosa Zarechnyı aýylynda 10 myń adam bar. Mine, endi osy kórsetkishterdi eskerip, Zatobol aýylyna qala mártebesin berýimiz qajet», - degen bolatyn oblys ákimi Arhımed Muhambetov.
Qostanaı aýdany ishki saıasat basqarmasynyń bólim mamany Ásel Súıinovanyń aıtýynsha, 18 naýryzda aýylǵa qala mártebesin berýge qatysty jıyn ótedi. Sondaı-aq bastamashyl top aýdan ákimine qazirgi Zatobol aýylynyń burynǵy ataýyn qaıtarý týraly usynys hat ta jazǵan. Turǵyndardyń pikirinshe, aýyl Qutty alap nemese Tobyl atalýy kerek.
«Osydan eki jyl buryn aýdan ákimi Qaırat Ahmetovke kirip, osy máseleni kótergenbiz. Zatobol ertede Qutty alap dep atalǵan. Bul týraly ózimizdiń klassık jazýshymyz Beıimbet Maılın «Jalbyr» povesinde jazǵan. Buǵan qosa jazýshy Jaısańbek Moldaǵalıev: «Samodýrovka Tobyldyń shyǵys betine ornalasqan, ýezdik qalanyń qalqany sekildi, ylǵı annan-munnan qashqan, ne adamnyń, ne qudaıdyń esebinde joq jataqtar mekeni bolatyn. Qyr elinen qalaǵa kelýshiler ol mekendi aınalyp ótip, Tobyl ózeniniń paromyna basqa jaqtan kelip minetin. Óıtkeni mundaǵy jataq buzaqylary kóldeneń kók attyny ótkizbeı, ne tonap jiberetin, ne sabap jiberetin. Sol minezine laıyq resmı Zatobolovka aty ózgerip, Samodýrovka bolyp ketken» degen derek keltiredi», - dedi belgili jazýshy Aqylbek Shaıahmet agenttik tilshisine.
Osy derekterdi keltirgen jazýshy aýyl ataýy ózgerýi tıis degen pikir bildirdi.
