Qostanaı oblysynda zardap shekkenderge kómek kórsetiledi

QOSTANAI. QazAqparat - Qostanaı oblysyndaǵy iri órttiń saldarynan zardap shekkenderge kómek kórsetý maqsatynda «Qazaqstan halqyna» qoǵamdyq qory oblys ákimdigimen birlesip, qaıyrymdylyq kómek kórsetý tetigin pysyqtady, dep habarlaıdy QazAqparat.

Taraptar osyǵan deıin zardap shekken turǵyndardyń úılerin jaraqtandyrýǵa, sondaı-aq balalardyń sporttyq-saýyqtyrý lagerin qalpyna keltirý sharalaryna qatysatyny týraly málimdegen bolatyn.

22 qazanda Qostanaı oblysynyń ákimdigi 3 qyrkúıekte bolǵan órtte úıleri tolyǵymen órtengen Áýlıekól aýylynyń turǵyndaryna 91 úıdiń kiltin tabys etti. Osyǵan baılanysty, «Qazaqstan halqyna» qoǵamdyq qorynyń Qamqorshylyq keńesi Qostanaı oblysynyń turǵyndaryna qaıyrymdylyq kómek kórsetý týraly sheshim qabyldady.

Úılerdi jaılastyrý (jabdyqtandyrý) úshin qor jergilikti atqarýshy organ tarapynan baspana alǵan árbir otbasyna 2 mln teńge bóledi. Osy maqsattarǵa qordyń qarajaty, sondaı-aq arnaıy shotyna jiberilgen E.Edilovtyń atynan «Yedilov Online» telegram-kanalyna jazylýshylardan jınalǵan qarajat (25 822 791 teńge) baǵyttalady.

Aıta keteıik, qyrkúıek aıynyń basynda «Qazaqstan halqyna» qory Qostanaı oblysynda zardap shekkenderge kómek kórsetý úshin arnaıy shot ashty. Búgingi tańda qordyń arnaıy shotynda 251 831 184 teńge bar.

«Qazaqstan halqyna» qorynyń Qamqorshylyq keńesi Áýlıekól aýdanynda órtengen «Dostyq» balalar sporttyq-saýyqtyrý lageriniń ornyna 150 oryndyq jańa balalar sporttyq-saýyqtyrý lagerin salý úshin qarjy bólmek. Jobalaý-smetalyq qujattama bekitilip, qurylys quny anyqtalǵannan keıin qor jańa balalar sporttyq-saýyqtyrý lageriniń qurylysyn qarjylandyrady. Nysandy salý úshin qordyń qarajaty jáne arnaıy shotyna «Stepnogorsk taý-ken-hımııa kombınaty» JShS, «Shákárim atyndaǵy ýnıversıtet» KEAQ, Qazaqstan musylmandary dinı basqarmasynyń «Zeket jáne qaıyrymdylyq» qory KQ, «AQMOL-project» JShS túsken qarajatty jumsaý josparlanýda.