Qostanaı oblysynda zańsyz memlekettik qyzmet kórsetken deldaldar ustaldy
Bıyl QR Іshki ister mınıstrligi men Memlekettik qyzmet isteri jáne sybaılas jemqorlyqqa qarsy is-qımyl agenttigi jemqorlyqqa qarsy kúres týraly 2019-2020 jyldarǵa arnalǵan is-sharalar josparyn bekitken bolatyn. Salaýat Múksimov baıandamasynda aıtqandaı, túbegeıli reformalardyń aıasynda sybaılas jemqorlyqqa qarsy zańnamanyń jańa modeli qalyptasyp, álemdik standarttarǵa sáıkes ınstıtýttar men mehanızmder qoldanysqa endi.
«Basty maqsatymyz - tek qana sybaılas jemqorlyqpen kúresý ǵana emes, onyń sebepterin anyqtap, túbegeıli joıý. Osy baǵytta sońǵy birneshe jylda 60-tan astam zań qabyldandy. Zańnyń durys oryndalýyna ishki ister organdarynyń da jaýapty ekeni sózsiz. Búginde Qazaqstannyń jol polıtseıleri sheteldik áriptesteriniń tájirıbesi boıynsha jańa formatta jumys isteýde. Zań taıaqshany qoldanýdy shektedi, ákimshilik is júrgizýde tsıfrlandyrý engizildi. Buǵan qosa, jol-patrýl polıtsııasy qyzmetkerleriniń kólik quraldaryn sebepsiz toqtatýǵa tyıym salynǵan», - dep atap ótti departament basshysy.
Statıstıkaǵa sensek, memlekettik qyzmet kórsetý salasy sybaılas jemqorlyqqa neǵurlym beıim. Salaýat Múksimovtiń sózinshe, jemqorlyq qylmystarynyń basym bóligi qyzmetkerlermen tikeleı baılanys nátıjesinde jasalady. Qylmystardyń deni para alýmen baılanysty.
«Jurtshylyqpen birlesip «Jasyryn satyp alýshy» is-sharasyn ótkizdik. Memlekettik qyzmetterdi kórsetý sapasynda deldaldyq qyzmettermen zańsyz aınalysatyn tulǵalar óz qyzmetin kóbinese HQKO aýmaǵynda júzege asyrady. Osy jyldyń basynan beri osyndaı qyzmet kórsetken 13 tulǵa ustaldy. Olarmen kúresý úshin keshendi jumys jospary quryldy. Sybaılas jemqorlyq faktilerin anyqtaý jáne onyń aldyn alýda turǵyndardyń kómegi zor», - dedi Salaýat Múksimov.
Sonymen qatar, departament mamandary memlekettik qyzmetkerler arasynda ishki sybaılas jemqorlyqty, múddeler qaqtyǵysyn, laýazymdyq ókilettikterin asyra paıdalanýdy joıý úshin jasyryn onlaın saýalnama uıymdastyrmaq.