Qostanaı oblysynda zań buzǵan 422 nysan men bir kásiporynnyń jumysy toqtatyldy
ASTANA. QazAqparat - QR Investıtsııalar jáne damý mınıstrligi 19 myńnan astam ónerkásip qaýipsizdigi talaptarynyń buzylǵanyn anyqtady, dep habarlaıdy QazAqparat mınıstrlik baspasóz qyzmetine silteme jasap.
Baspasóz málimetterine qaraǵanda, Qazaqstan Respýblıkasynyń Investıtsııalar jáne damý mınıstrligi qaýipti óndiristik nysandarǵa turaqty túrde baqylaý júrgizedi. Osyǵan qaraı 2018 jyldyń birinshi jartyjyldyǵynyń qorytyndysy boıynsha, QR IDM Indýstrııalyq damý jáne ónerkásiptik qaýipsizdik komıteti men komıtettiń aýmaqtyq departamentteri bekitilgen kestege sáıkes 608 tekserý júrgizdi. Onyń barysynda 7 myńnan astam qaýipti óndiristik nysan tekserilgen.
Kestege sáıkes atalǵan tekserýlermen qatar, 445 jospardan tys tekserý júrgizildi. Onyń 354-i buryn berilgen buıryqtardyń oryndalýyn baqylaý, 39-y memlekettik organdardyń (prokýratýrany qosa alǵanda), 10-y jeke jáne zańdy tulǵalardyń ótinimderi boıynsha jáne 42 basqadaı jaǵdaılar boıynsha tekserildi. 4999 nysan jospardan tys tekserýden ótken.
«Tekserý qorytyndylary boıynsha, 19130 ónerkásiptik qaýipsizdik talaptarynyń buzylǵany anyqtaldy. Qostanaı oblysy sotynyń sheshimi boıynsha óreskel zań buzýshylyqtarǵa jol bergen 422 nysan men bir kásiporynnyń jumysy toqtatyldy. Birinshi jartyjyldyqtyń qorytyndysy boıynsha barlyǵy 967 ákimshilik aıyppul salynǵan eken. Onyń 584-i zańdy tulǵalarǵa, 383-i jeke tulǵalarǵa salynǵan»,-delingen habarlamada.
