Qostanaı oblysynda xalyq úshin 300-ge jýyq kottedj salynady - ákim Muxambetov
ASTANA. QazAqparat - Qostanaı oblysynyń ákimi Arxımed Muxambetovtiń aıtýynsha, osy saladaǵy sharalar jalǵasatyn bolady, dep xabarlaıdy QazAqparat tilshisi.
«Jeke turǵyn úı qurylys salasyndaǵy sharalardy erekshe atap ótkim kelip otyr. Qazirdiń ózinde biz «Severnyı» shaǵyn aýdanynda (Qostanaı qalasyna jaqyn Zarechnyı kentinde - avt.) úılerdi salýǵa kiristik. Bıyl 270 úıdi bitirýge tyrysamyz. Eki merdiger bar. Ol úılerdi salý mexanızmi de ońaı. Oǵan sáıkes, merdigerler jeke úılerdi óz aqshasyna salady. Artynan óz shyǵyndaryn Turǵyn-úı qurylys jınaq banki arqyly qaıtaryp alady. Sebebi búginde atalǵan bankte biraz adamdardyń salymdary jınaldy. 30 myńdaı adam kezekte tur. Aqsha da az emes. Olar úıdi alǵannan keıin aıyna ortasha eseppen 40-70 myń teńgedeı tóleıtin bolady. Tólemniń mólsheri úıdiń sharshy metrine baılanysty», - dedi Muxambetov Astanada ótken baspasóz máslıxatynda.
Ákimniń aıtýynsha, jeke turǵyn úıler jańa texnologııa boıynsha salynyp jatyr. Sonyń aıasynda bir úıdi eki jarym aıdyń ishinde turǵyzýǵa múmkindik bar. Úılerdiń aýdany 70 sharshy metrden bastalyp, 110 sharshy metrge deıin barady.
«Osylaısha, bank salymshylary ózderine yńǵaıly úıdi tańdaı alady. Atalǵan baǵytta tıisti jumystar jalǵasa beredi», - dep atap kórsetti oblys basshysy. Aldaǵy ýaqytta Rýdnyı, Qostanaı qalalary jáne Qostanaı aýdanyndaǵy turǵyn-úı qurylysyna erekshe basymdyq beriledi. Sebebi atalǵan úsh aımaqta xalyqtyń 50 protsentten astamy turady.
