Qostanaı oblysynda úı karantınindegi naýqastardy baqylaıtyn mobıldi top quryldy
QOSTANAI.QazAqparat – Óńirlik kommýnıkatsııalar qyzmeti alańynda Qostanaı oblysy ákimdiginiń densaýlyq saqtaý basqarmasy basshysynyń orynbasary Anjela Beksultanovanyń qatysýymen brıfıng ótti, dep habarlaıdy QazAqparat.
Anjela Beksultanovanyń aıtýynsha, búginde Qostanaı oblysynda COVID-19 juqtyrǵan 451 adam tirkeldi. Onyń 337-si vırýs tasýshylar sanalady. 215 adam saýyǵyp ketse, 3 adam kóz jumdy. Koronavırýstyq ınfektsııanyń aldyn alý jáne taralýyna jol bermeý maqsatynda oblysta barlyq qajetti is-sharalar júrgizilýde.
«Medıtsınalyq uıymdardyń tósek-oryndaryn bólý epıdemıologııalyq jaǵdaıdy esepke ala otyryp, qaıta qarastyrylady. Qazirgi ýaqytta ınfektsııaǵa qarsy turý úshin 1 488 tósek daıyndaldy. Infektsııalyq statsıonarlarda aýrý belgileri baıqalǵan patsıentterge medıtsınalyq kómek kórsetiledi. Naýqastarmen baılanysta bolǵan adamdardyń tizimi jasalyp, sanıtarlyq-epıdemıologııalyq is-sharalar qolǵa alynady. COVID-19 indetin tasýshy sanatyna kiretinder úıde oqshaýlanýda. Ózin-ózi oqshaýlaýǵa jaǵdaıy bolmaǵandar karantındik statsıonarǵa aýystyrylady. Árbir medıtsınalyq uıymda úı karantınindegi naýqastardy baqylaý maqsatynda mobıldi top uıymdastyryldy. Jedel járdem stantsııasy kúsheıtilgen rejımde halyqtyń shaqyrtýlaryna qyzmet kórsetedi. 15-25 maýsym aralyǵynda jedel járdem shaqyrýlarynyń sany 11%-ǵa óskeni baıqalady», - deıdi maman.
Osy kúni TMD jáne epıdemıologııalyq kórsetkishter boıynsha qolaısyz elderden kelgen 1000 adam úı karantıninde. Densaýlyq saqtaý basqarmasynyń 23 maýsymdaǵy buıryǵyna sáıkes, koronavırýstyq ınfektsııasy rastalǵan adamdar úshin kompıýterlik-tomografııalyq zertteýler júrgiziledi.
«Densaýlyq saqtaý basqarmasynyń WhatsApp jelisinde jedel nómiri (8 777 375 44 77) jáne chaty bar. Oǵan kez kelgen turǵyn jaza alady. Sondaı-aq, basqarmanyń áleýmettik jelilerinde tikeleı efırler ótip turady. Halyqqa koronavırýstyq ınfektsııa kezinde dárigerlik keńes berý úshin táýlik boıy Call-ortalyq jumys isteıdi», - dep atap ótti Anjela Beksultanova.
Oblysta medıtsınalyq kadr tapshylyǵy baıqalmaıdy. Búginde 600-ge jýyq medıtsına qyzmetkeri KVI-diń aldyn alý jáne taralýyna jol bermeý boıynsha daıyndyqtan ótti. Kelesi aptanyń sońyna deıin oblystyń barlyq medıtsına qyzmetkeri bekitilgen kestege saı oqytylady.
