Qostanaı oblysynda úshinshi tamyzǵa deıin lokdaýn rejımi engizilmek
QOSTANAI. QazAqparat – Búgin Qostanaı oblysynda koronavırýs ınfektsııasynyń aldyn alý maqsatynda lokdaýn rejımin belgileý týraly qaýly shyǵaryldy, dep habarlaıdy QazAqparat.
Qostanaı oblysynyńy ákimi Arhımed Muhambetov koronavırýstyq ınfektsııanyń taralýyna jol bermeý jónindegi jedel shtab otyrysyn ótkizgen bolatyn. Jıyn barysynda óńirde qatań shekteý sharalaryn engizý týraly qaýly qabyldandy.
Sonymen, Qostanaı oblysynyń memlekettik bas sanıtarlyq dárigeriniń orynbasary ıÝ.Sevostıanovtyń sheshimimen shekteý sharalary 18 shildeden 3 tamyzǵa deıin jalǵasady.
«Turǵyndarǵa qajet bolǵan jaǵdaıda ǵana 3 adamnan aspaıtyn toppen áleýmettik qashyqtyqty saqtaı otyryp, bir otbasy músheleriniń turatyn jerinen shyǵýyna ruqsat etiledi. Oıyn-saýyq qyzmetiniń barlyq túrlerine, buqaralyq is-sharalardy ótkizýge, qoǵamdyq kólik qyzmetine , (saıajaı marshrýttaryn qospaǵanda, qozǵalys kestesin anyqtaýmen saǵat 06:00-den saǵat 10:00-ge deıin, saǵat 17:00-den 21:00-ge deıin) tyıym salynady. Qoǵamdyq tamaqtaný obektileriniń qyzmeti tek daıyn taǵamdardy tutynýshyǵa saǵat 09:00-den 21:00-ge deıin shyǵarýǵa jáne jetkizýge ruqsat etiledi (ýaqyt boıynsha shekteý jol boıyndaǵy servıs obektilerine qoldanylmaıdy). Tamaq ónimderin satatyn saýda obektilerin, dárihanalardy qospaǵanda, barlyq saýda obektileriniń qyzmetine ruqsat berilmeıdi. Azyq-túlik ónimderin, kóterme satýdy qospaǵanda, satylatyn assortımentke qaramastan barlyq saýda bazarlarynyń qyzmetine tyıym salynady. Halyqqa baılanyssyz qyzmet kórsetý jónindegi obektilerdiń (avtomobıl jýý, avtomobılderdi, turmystyq tehnıkany, kıimdi, aıaq kıimdi jóndeý) qyzmetine shekteý belgilendi. Skverler, saıabaqtardyń, jaǵalaýlardyń, onyń ishinde olardyń aýmaqtarynda ornalasqan tamaqtaný jáne saýda núkteleriniń, sondaı-aq jaǵajaılar men demalys bazalarynyń qyzmetin toqtata turýǵa sheshim qabyldandy», - delingen bas sanıtar dárigerdiń qaýlysynda.
Qaýly 2020 jylǵy 18 shildede saǵat 00:00-den bastap kúshine enedi.
