Qostanaı oblysynda úshem dúnıege keldi

QOSTANAI. QazAqparat – Qostanaı oblysyna qarasty Meńdiqara aýdanynda Nıkolaı, Evgenıı jáne Vıoletta esimdi úshem dúnıege keldi. Bul týraly óńirlik densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat tilshisi.

Meńdiqara aýdany Harkovskıı aýylynyń turǵyny Alena Petrovanyń bosanýy merziminen buryn bastalǵan. Artynsha joldasy jedel járdem shaqyrmaı, áıelin aýdan ortalyǵyndaǵy aýrýhanaǵa dosynyń kóligimen aparypty.

«Tańǵy 06:00-de 2 ul (salmaǵy 2070 gr jáne 1860 gr) jáne 1 qyz (1680 gr) dúnıege keldi. Jańa týǵan nárestelerdiń jaǵdaıy tekserilip, qajetti protsedýralar jasalǵannan keıin birden kútim jasaý úshin kıývezderge ornalastyryldy. Al bir táýlikten keıin sanıtarlyq avıatsııa ushaǵymen aýdandyq dárigerler balalardy Qostanaı oblystyq aýrýhanasynyń perınataldyq ortalyǵyna emdeýge jiberdi. Er balalar birden bólimge ornalastyryldy, qyz eki kún jansaqtaý bóliminde boldy», - dep málim etti basqarmanyń baspasóz qyzmetinen.

Meńdiqaralyq Petrovtar otbasynda endi 7 bala. Alena Petrovanyń aıtýynsha, úlken baýyrlary sábılerdi asyǵa kútip júr.

«Biz otbasymyzben qýanyshtymyz. Dárigerlerge alǵysym sheksiz. Balalar úıde baýyrlaryn kútip júr. Úlken ulymyz endigi eresek, bizden bólek turady. Qalǵandary bizben birge. Olar bala kútimi boıynsha maǵan kómektesedi. Qazir balalarym salmaq qossa, onda úıge shyǵamyz», - deıdi kópbalaly ana.

Oblystyq perınataldyq ortalyqtaǵy balalar bóliminiń meńgerýshisi Igor Boıkonyń aıtýynsha, qazir sábılerge qajetti terapııa kórsetilip, olar salmaq qosyp jatyr. Degenmen birshama ýaqyt aıryqsha kútimdi talap etedi.

Foto: Densaýlyq saqtaý basqarmasy