Qostanaı oblysynda úsh dárihana dárilerdi qymbat baǵaǵa satyp kelgen
QOSTANAI.QazAqparat – Qostanaı oblysynda dári-dármekterdi qymbat baǵaǵa satqan dárihanalar anyqtaldy, dep habarlaıdy QazAqparat Oblystyq taýarlar men qyzmetterdiń sapasy men qaýipsizdigin baqylaý departamentiniń baspasóz qyzmetine silteme jasap.
Departament mamandary apta saıyn dárihanalardy aralap, medıtsınalyq qural-jabdyqtar men dári-dármekter baǵasyna monıtorıng jasaıdy. Kezekti tekserý sharalarynyń nátıjesinde dárilerdiń qunyn ósirip satqan dárihana jelileri anyqtaldy.
«Qostanaı qalasynyń 3 dárihanasynda dárilik preparattarǵa belgilengen shekti baǵadan asyryp satý faktileri tirkeldi. Mysaly, dárihanadaǵylar «Ksımelın 0,1%» dárisiniń 10 ml úshin 590 teńge suraǵan. Alaıda, onyń shekti baǵasy 501,26 teńgeden aspaýy tıis. Sonymen qatar «Lıneks №32», «Zınerıt», «Dentınoks-gel», «Grıpgo» dárileriniń birneshe ese artyq baǵada satylǵany belgili boldy. Osy faktiler boıynsha dárihana basshylaryna aýyzsha eskertý jasaldy. Reıdtik is-sharalar jalǵasatyn bolady», - deıdi departamenttiń baspasóz hatshysy Sáýle Manasqyzy.
Oblystyq taýarlar men qyzmetterdiń sapasy men qaýipsizdigin baqylaý departamenti turǵyndardy dári-dármek baǵasynyń negizsiz qymbattaýyna qatysty derekterdi habarlaýǵa, zańsyzdyq týraly ýákiletti organdarǵa júginýge shaqyrady.
