Qostanaı oblysynda ýlanǵan áıeldi kórshileri qutqaryp qaldy
QOSTANAI. QazAqparat – Qostanaı oblysynda peshti abaısyz qoldaný saldarynan 43 jastaǵy áıel ystan ýlanyp qaldy, dep habarlaıdy QazAqparat.
Oqıǵa keshe Denısov aýdanynyń Dosov aýylyndaǵy Berezovyı kóshesinde tús mezgilinde bolǵan.
«Jeke turǵyn úıde pesh jaǵý kezindegi uqypsyzdyq saldarynan 43 jastaǵy áıel ysqa ýlanyp qaldy. Týys-jaqyndary ony Lısakov qalalyq aýrýhanasyna jetkizdi», - deıdi oblystyq TJD baspasóz qyzmetindegiler.
Tútin jaılaǵan bólmede es-tússiz jatqan úı ıesin kórshileri taýyp alǵan. Dárigerler oǵan «Aýyr ýlaný» dıagnozyn qoıdy.
Al jábirlenýshi áıeldiń inisiniń aıtýynsha, ot jaqpas buryn peshtiń qalpy tekserilmegen. Óıtkeni, úı ıesi jaqyn kúnderi Rýdnyı qalasyna túbegeıli qonys aýdarmaq bolǵan.
