Qostanaı oblysynda tuńǵysh ret respýblıkalyq ázil-syqaq festıvali ótti

QOSTANAI. QazAqparat - Arqalyqta belgili jazýshy, etnograf-ǵalym Seıit Kenjeahmetovtyń 80 jyldyǵyna arnalǵan «Mirdiń oǵy» respýblıkalyq ázil-syqaq teatrlarynyń festıvali ótti, dep habarlaıdy QazAqparat Qostanaı oblysy mádenıet úıleriniń aqparattyq portalyna silteme jasap.

Óńirde tuńǵysh ret ótkizilgen festıvalde Aqtóbe qalasynan kelgen «EKІ EZÝ» satıra teatry Seıit Kenjeahmetovtyń «Ene men kelin» ıntermedııasyn jáne «Revızor» shyǵarmasyn sahnalady.

Elimizge tanymal belgili syqaqshy, Qazaqstannyń Eńbek sińirgen qaıratkeri Kópen Ámirbek Seıit Kenjeahmetov jaıly estelikter aıtyp, qazaqy qaljyńnyń qasıeti jóninde baıandap berdi.

Respýblıkalyq ázil-syqaq festıvali oblystyq irikteý kezeńiniń jeńimpazy Arǵyn Júkebaev Seıit Kenjeahmetovtyń «Jaǵympazǵa keńes» satıralyq shyǵarmasyn, televızııalyq «Kóńilashar» jobasynyń jeńimpazy Birjan Júzbaı «Seıit aǵamyz degen eken» qaǵytpa qaljyńdaryn sheberlikpen oryndap, kórermenniń yqylasyna bólendi. QR Mádenıet qaıratkeri Naǵashybaı Muqatov Seıit Kenjeahmetovke arnaǵan óleńin oqydy.

Jangeldın aýdanynan kelgen Jolamanovtar otbasylyq ansambli Qalıbek Deripsaldınniń «Aınakól jaǵasynda» ánin oryndasa, Arqalyq qalasynyń «Murager» ansambli án men kúıden shashý shashty.
Respýblıkalyq ázil-syqaq teatrlary festıvaliniń qorytyndysynda
«Úzdik debıýt» nomınatsııasyn Elýbaı Ómirzaqov atyndaǵy Qostanaı oblystyq fılarmonııanyń janynan qurylǵan «Masa» ázil-syqaq teatry jeńip aldy.

«Mundaı aýqymdy festıval oblysta tuńǵysh ret ári joǵary deńgeıde ótti. Bul - Seıit aǵamyzǵa degen eldiń qurmeti bolsa kerek. Osyndaı sharalar Qostanaı oblysynda jıi uıymdastyrylsa degen tilek bar», - deıdi belgili ártis Oljas Begaıdarov.

Ad «Úzdik ázil-syqaq teatry» nomınatsııasyn Meńdiqara aýdanynan kelgen «Ádemi ázil» stýdııasy jeńip aldy.

Aqtóbe qalasynyń «EKІ EZÝ» satıra teatry Seıit Kenjeahmetov atyndaǵy júldege ıe boldy.