Qostanaı oblysynda tumaýǵa qarsy 70 myń vaktsına satyp alyndy

QOSTANAI. QazAqparat – Qostanaı oblysynda tumaýǵa qarsy vaktsınatsııalaý jalǵasýda. Bıyl vaktsına byltyrǵydan kóbirek satyp alynady, dep habarlaıdy QazAqparat tilshisi.

2020 jyly Qostanaı oblysyna tumaýǵa qarsy 96 myń vaktsına satyp alynady. Qazir respýblıkalyq bıýdjetten bólingen qarjyǵa vaktsınanyń 70 myń dozasy alyndy.

Taǵy 26 myńyn alý boıynsha kelisimshart jasaldy.

Bul byltyrǵydan kóp, tıisinshe jergilikti emhanalarǵa vaktsınatsııa josparyn ulǵaıtýǵa múmkindik berdi.

Máselen, Qostanaı qalasyndaǵy 4-shi emhanada dárigerler 6 myńǵa jýyq vaktsına aldy. Olar arnaıy sanattaǵy adamdardy tegin egedi.

«Vaktsına reseılik «Grıppol plıýs» óndirisinen satyp alyndy. Arnaıy sanatqa edıtsına qyzmetkerleri, sozylmaly aýrýlary bar adamdar, ata-anasynyń qamqorlyǵynsyz qalǵan balalar, júkti áıelder jáne áleýmettik mekemelerdegi adamdar kiredi. Tegin egilý úshin tirkelgen emhanaǵa habarlasýǵa bolady. Qaýip-qater tobyna kirmeıtin adamdar aqy tólep egiledi»,- deıdi Qostanaı oblysy boıynsha taýarlar men qyzmetterdiń sapasy men qaýipsizdigin baqylaý departamentiniń bólim basshysy Gúlim Dosymova.

Onyń aıtýynsha, ekpeni aýyryp júrgen kezde alýǵa múlde bolmaıdy. Máselen, koronavırýs juqtyrǵandar indetten aıyqqannan keıin 1 aı ótisimen ǵana tumaýǵa qarsy ekpeni saldyra alady. Onyń áseri 8 aıǵa deıin jaramdy