Qostanaı oblysynda tótenshe jaǵdaı rejımin buzǵan 10 adam qamaýǵa alyndy
QOSTANAI. QazAqparat – Qostanaı qalasynda tótenshe jaǵdaılarǵa baılanysty qurylǵan monıtorıng toby birneshe tártip buzýshylyqty anyqtady, dep habarlaıdy QazAqparat oblystyq ishki saıasat basqarmasyna silteme jasap.
Monıtorıng toby TJ rejıminiń buzylýyn anyqtaý maqsatynda 93 obektini tekserdi. Ál-Farabı jáne Abaı dańǵyldary, Amangeldi, Táýelsizdik, Skladskaıa, S.Máýlenov kóshelerinde ornalasqan nysandar boıynsha túsindirý jumystary júrgizilip, usynys qaǵazdary taratyldy. Qalanyń barlyq PIK men mekemelerinde tıisti usynymdar berildi.
«Nysandardyń basshylyǵyna TJ jáne karantın kezindegi is-qımyl tártibi týraly jadynama usynyldy. Shekteý sharalaryn saqtamaý faktileri Abaı dańǵyly 82-úıdegi «Columbo Pab» karaoke-barynda jáne Abaı dańǵyly men Pýshkın kóshesiniń qıylysyndaǵy «Metropol» SÚ «Atameken» bóliminde anyqtaldy», - delingen basqarma aqparatynda.
Jalpy, oblys boıynsha TJ rejımin buzǵany úshin 10 adam qamaýǵa alyndy.
Atap aıtqanda, «Blek mıst» mekemesiniń ıesi 12 táýlikke qamaldy.
Áýlıekól aýdanynyń Amanqaraǵaı kentinde 58 jastaǵy aýyl turǵyny tártip buzǵany úshin 15 táýlikke jabyldy.
Sondaı-aq Rýdnyı qalasynda «50 let Oktıabrıa» kóshesindegi kompıýter klýbynyń ıesi 2 táýlikke oqshaýlaǵysh ızolıatoryna qamaldy.
