Qostanaı oblysynda «Tobyl-Qartaly» baǵytyndaǵy jumys poıyzynyń quramyna úsh jolaýshylar vagony tirkeldi

«2011 jyldyń 19 tamyzynan bastap «QTJ»UK» AQ halyqtyń temirjol kóligindegi jolaýshylar tasymalyna degen suranysyn qanaǵattandyrý maqsatynda, sondaı-aq Qostanaı oblysy turǵyndarynyń ótinishterin eskere otyryp, № 5201/5202 «Tobyl-Qartaly» baǵytynda qatynaıtyn jumys poıyzynyń quramyna úsh jolaýshylar vagonyn tirkedi. Tasymaldaýshy - «Qala mańyndaǵy tasymal» AQ («Jolaýshylar tasymaly» AQ-nyń enshiles kásiporny)», - dep atap ótti «Jolaýshylar tasymaly» kompanııasy baspasóz qyzmetiniń ókilderi.

Poıyzdyń quramy bes vagonnan turady, onyń biri - jabyq, biri - «QTJ»UK» AQ-nyń qyzmetkerlerine arnalǵan klastyq jáne jolaýshylarǵa arnalǵan úsh qosymsha vagon. Ár qosymsha vagonda jolaýshylarǵa 81oryn qarastyrylǵan. Baǵyttyń áleýmettik mańyzy joǵary. Sebebi, «Tobyl-Qartaly» jumys poıyzy «Bataly», «Zaıatsk», «Aqsý» stansylarynyń jáne 11 eldi mekenniń turǵyndary úshin osy baǵyttaǵy negizgi qatynas quraly bolyp tabylady.

Osy qatynastyń arqasynda «Tobyl-Qartaly» marshrýty boıynsha bir baǵytta 243 jolaýshyny qosymsha tasymaldaýǵa múmkindik bar. Temirjol bıletiniń quny Tobyl stansasynan Qartaly stansasyna deıin 407 teńgeni quraıdy.

Eske salaıyq, Qazaqstan Respýblıkasy men Reseı Federatsııasynyń úkimetaralyq kelisimine sáıkes, 2011 jyldyń 1 shildesinen bastap 102 shaqyrymdy quraıtyn «Tobyl-Aqsý» temirjol ýchaskesi reseıden «QTJ»UQ» AQ-nyń teńgerimine berildi. Osy ýaqytqa deıin bul temirjol ýchaskesi boıynsha Reseı Federatsııasynyń Ońtústik-Ýral temirjolyna qaraıtyn №6527/6528 «Qartaly-Tobyl» qala mańy poıyzy qatynap, ol 2011 jyldyń 1 shildesinen bastap qatynaýyn toqtatty.