Qostanaı oblysynda tirkelmegen 270 qoqys polıgony bar
QOSTANAI. QazAqparat - Qostanaı oblysynda qatty turmystyq qaldyqtar tastaıtyn polıgondar ornalasqan jer telimderiniń jalǵa alý merzimi aıaqtaldy. Bul týraly oblystyq ekologııa jáne qorshaǵan ortany qorǵaý departamentiniń basshysy Vıktor Muhamedjanov málim etti, dep habarlaıdy QazAqparat tilshisi.
Jalpy, oblysta sheshimin tappaǵan ekologııalyq máseleler az emes. Bıyl osyndaı ekologııalyq túıtkildi máseleniń on ekisi óz sheshimin taýypty. Endigi qalǵany - beseý. Oblys ákimi Arhımed Muhambetovtiń qatysýymen ótken kezekti apparat jınalysynda qorshaǵan ortany qorǵaýǵa qatysty birqatar másele talqyǵa tústi.
«Qostanaıda áli kúnge deıin aǵyn sýlardy bıologııalyq tazartýdan ótkizetin birde-bir stansa joq. Eski nysan 1966 jyly paıdalanýǵa berilgen. Ony jańartatyn ýaqyt jetti. Ol tek qana mehanıkalyq qospalardy tazartýǵa qaýqarly. Onyń ózi 20 %-dan aspaıdy. Al, jańa nysan salý úshin qomaqty qarjy kerek. Sol sebepti, «Qostanaı-Sý» mekemesi sý tazartýdyń balamaly tásilderi engizý máselerin qarastyryp jatyr», - deıdi oblystyq ekologııa jáne qorshaǵan ortany qorǵaý departamentiniń basshysy Vıktor Muhamedjanov
Onyń sózinshe, sýdyń lastanýyna Tobyl ózeni jaǵasynda ornalasqan burynǵy jez-ammıak óndirisi zaýytynyń áseri bolǵan. Onyń sý sapasyna qanshalyqty áser etkendigi zertteldi. Jaqyn arada nátıjesi anyqtalady.
Aımaqta qatty turmystyq qaldyqtardy saqtaý jáne qaıta óńdeýmen aınalysatyn kásiporyn joq. Qaldyqtar qala syrtyndaǵy polıgondarǵa jóneltiledi. Oblysta mundaı polıgondardyń sany - 300. Sonyń 270-i tirkelmegen. Munymen jergilikti atqarýshy bılik aınalysýy tıis.
«Denısov, Qarabalyq, Jitiqara, Amankeldi, Jankeldın, Áýlıekól aýdandarynda qaldyq shyǵaratyn oryn az. Al, jer telimderiniń jalǵa alý merzimi áldeqashan bitken. Ondaı jaǵdaıda ol jer qalpyna keltirilýi tıis. Máselen, Qostanaıdaǵy «ıÝjnyı» shaǵyn aýdanynda burynǵy polıgon tazartyldy», - dedi Muhamedjanov.
Oblys ákimi Arhımed Muhambetov máseleni bir jaqty etý úshin aýdan, qala basshylaryna eki aı ýaqyt berdi.
«Barlyq ekologııalyq máseleler tıisti merzimde óz sheshimin tabýy qajet. Eger máseleni tez arada retke keltirmeseńizder, onda salalyq mınıstrlikke júginýge týra keledi», - dedi óńir basshysy.
Aıta keteıik, Qostanaı oblysy ónerkásip qaldyqtarynyń kólemi boıynsha respýblıkada birinshi orynda tur. Al atmosferaǵa qaldyqtyń jaıylýy jóninen on ekinshi orynda.
