Qostanaı oblysynda tennısshilerge páter berildi
Saltanatty sharaǵa oblystyq dene shynyqtyrý jáne sport basqarmasynyń basshysy Azamat Begalın qatysty. Ol qostanaılyq sýrdlımpıadashylardyń aımaqtyq sporttyń damýyna úlken úles qosqanyn atap ótti.
«2017 jyly sýrdlımpıada oıyndarynda elimizdiń qurama komandasynda qostanaılyq sportshylar Danııar Eskendirov, Qanat Qońqabaev jáne Gaıp Danııarov ústel tennısi boıynsha komandalyq jarystarda qola medal jeńip aldy. Olar 2016 jylǵy Álem chempıonatynda júldeli ekinshi orynǵa ıe bolǵan edi. Qazaqstan Respýblıkasynyń 2014 jylǵy 3 shildedegi № 228-V QR zańyna sáıkes Olımpıada chempıondary men júldegerlerine jergilikti ákimdik tarapynan páter beriledi. Tıisinshe, chempıonǵa úsh bólmeli páter, kúmis medalǵa eki bólmeli, qola júlde alǵan sportshyǵa bir bólmeli páter usynylady», - dedi basqarma basshysy.
Sonymen, ústel tennısi sheberleri – Danııar Eskendirov, Qanat Qońqabaev jáne Gaıp Danııarovtarǵa «ıÝbıleınyı» shaǵynaýdanynan bir bólmeli páter kilti tabys etildi. Olardyń bapkeri Serik Danııarovqa oblys ákiminiń alǵys haty berildi. Serik Danııarov 20 jyldan astam ýaqyt Estý qabileti buzylǵan balalarǵa arnalǵan Qostanaı mektep-ınternatynda jumys isteıdi. Balalardy ústel tennısine baýlyp, halyqaralyq jarystarǵa deıin shyǵarǵan.
Baspanaly bolǵan sportshylardy oblys ákimi Arhımed Muhambetov áleýmettik jeli arqyly quttyqtady.
«Sportshylarymyzdy jańa baspanamen quttyqtaımyn! Jańa páterlerde jaılylyq, jylýlyq jáne sporttyq jetistikter tileımin!» - dep jazdy oblys basshysy ınstagramdaǵy paraqshasynda.
Eske salaıyq , XXIII Cýrdlımpıada oıyndary Túrkııanyń Samsýn qalasynda ótken bolatyn. Tórtjyldyqtyń basty oıynyna estý qabileti nashar úsh myńǵa jýyq sportshy qatysqan. Al Qazaqstannan 9 sport túri boıynsha 50-ge jýyq sportshy barǵan edi. Olar erkin jáne grek-rım kúresi, sambo, jeńil atletıka, júzý, taekvondo, ústel tennısi jáne sporttyq baǵdarlama boıynsha synǵa túsken bolatyn.
