Qostanaı oblysynda tas jolda toqtatylǵan kólikten 100 kg astam marıhýana tabyldy

NUR-SULTAN. QazAqparat – Qostanaı oblysy PD Esirtki qylmysyna qarsy is-qımyl basqarmasynyń qyzmetkerleri «Qarasora 2022» jedel aldyn alý sharasy aıasynda óńirge esirtki jetkizý arnasynyń jolyn kesti, dep habarlaıdy QazAqparat Polisia.kz saıtyna silteme jasap.

«31 tamyzda jedel is-sharalar ótkizý kezinde Qostanaı-Áýlıekól-Surǵan tas jolynyń 107 shaqyrymynda Lada Largus avtokóligin júrgizgen Qarabalyq aýdanynyń 46 jastaǵy turǵyny toqtatylǵan. Tintý barysynda kóliktiń salonynan ósimdik tektes zat salynǵan úsh qap tabylǵan. Saraptama bul zattyń salmaǵy 100 keliden asatyn keptirilgen marıhýana ekenin kórsetti. Alǵashqy tergeý áreketterin júrgizý kezinde atalǵan esirtkiniń iri partııasy oblysqa elimizdiń ońtústik óńirlerinen jetkizilgeni anyqtaldy», - deıdi bólimshe bastyǵy Asylbek Álmaǵambetov.

Aıtýynsha, esirtki oblys aýmaǵynda taratý maqsatynda jetkizilgen.

«Qazirgi ýaqytta QR QK 297-baby 3-bóligi (Esirtki zattaryn ótkizý maqsatynda zańsyz saqtaý, iri jáne asa iri kólemde ótkizý) boıynsha sotqa deıingi tergeý bastaldy. Kúdikti qamaýǵa alyndy», - dep atap ótti Asylbek Álmaǵambetov.

Jyl basynan beri Qostanaı polıtseıleri zańsyz aınalymnan 170 keliden astam túrli esirtki zatyn tárkilendi.

«Qarasora 2022» jedel aldyn alý is-sharasynyń maqsattarynyń biri – elimizdiń basqa óńirlerinen esirtki jetkizý jáne ótkizý arnalarynyń jolyn kesý. Bul maqsatta oblysta arnaıy qurylǵan mobıldi toptar jumys isteıdi.

Foto: polisia.kz