Qostanaı oblysynda tárkilengen múlikter 64 mln teńgege satyldy
QOSTANAI. QazAqparat - Qostanaı oblystyq Memlekettik múlik jáne jekeshelendirý departamenti ústimizdegi jyldyń 8 aıynda jalpy quny 64 mln 652 tyń teńge bolatyn múlik tárkilegen.
Bul jaıly búgin oblystyq ákimdiktiń otyrysynda departament basshysy Aıbek Ǵalymjanov málim etti, dep habarlaıdy «QazAqparat» HAA tilshisi.
«Esepti kezeń barysynda 259 481 birlik tárkilengen múlik sot úkimderiniń zańdy kúshine enýine baılanysty memlekettik múlikter tizimine kirgizý úshin departamenttiń tirkeýine alyndy. Sonyń ishinde: jyljymaıtyn múlik - 3-eý, avtokólik quraldary - 40, eki JShS qatysym úlesi, baǵaly buıymdar - 289,3 gramm, alkogol ónimderi - 174 678 dana, temeki ónimderi - 83 601 qorapsha, HTT (halyq tutyný taýarlary) jáne basqa da múlikter - 935 birlik», - dep málimdedi Ǵalymjanov.
Budan tys, oblystyq vedomstvo bastyǵynyń sózine qaraǵanda, memlekettik qyzmetkerler bergen 42 syılyq memlekettik qorǵa alynǵan.
«Departament tárkilegen múliktiń ishinen 1 ǵımarat, 6 avtokólik quraly, 23,3 JJM (janar-jaǵarmaı materıaldary), 19 keńse tehnıkasy veb-portal arqyly, ótinishter negizinde memlekettik organdar balansyna qaıtarymsyz berilgen. Al 289,3 gramnyń baǵaly buıymy QR Ulttyq bankine ótkizildi. Tárkilengen múliktiń qalǵan bóligi elektrondy aýktsıon arqyly satylymǵa shyǵarylyp, jalpy somasy 64 mln 652 myń teńgege satylǵan», - dedi Aıbek Ǵalymjanov.
