Qostanaı oblysynda tarıhı-mádenı murany saqtaý ortalyǵy ashylmaq
Oblystyq Mádenıet basqarmasynyń basshysy Erlan Qalmaqovtyń sózinshe, óńirde 29 kıeli nysan bar. Atap aıtqanda, jalpyulttyq mańyzy bar – 10, óńirlik mańyzy bar 19 nysan tirkelgen. Olardyń qoljetimdiligin arttyrý jáne ınfraqurylymdy damytý boıynsha jasalǵan Jol kartasynyń sheńberinde 175 mln teńge jumsalǵan.
«Amangeldi, Jangeldın, Denısov, Qostanaı, Meńdiqara, Naýyrzym aýdandarynyń ákimdikteri 2018-2020 jyldarǵa arnalǵan Jol kartasynda kózdelgen is-sharalardy tolyq kólemde oryndady. Jangeldın aýdanynda jalpy somasy 3,65 mln teńgege Qazybaı áýlıe mazaryna qurylys jumystary júrgizilip, zııarat etýge kelgender úshin úı salyndy. Qobyzshy Tilep Aspantaıuly jerlengen jerde 12 mln teńgege mavzoleı turǵyzyldy. Beıimbet Maılın aýdanyndaǵy Jabaǵy Ipanuly batyrdyń jerlengen jerine qorshaýlar men qaqpa ornatylyp, kirme jol salyndy. Jalpy, oblystyń barlyq kıeli nysany qanaǵattanarlyq jaǵdaıda. Barlyq obektilerde QR kody bar úsh tildegi aqparattyq taqtaıshalar ornatylǵan», - dep málim etti Erlan Qalmaqov.
Osy jyly Qostanaı oblysynyń kıeli jerleriniń tizimine qosymsha 9 nysan engizildi.
Erlan Qalmaqov oblys ákimine 2020 jyly tarıhı-mádenı murany saqtaý ortalyǵyn ashýdy usyndy. Ortalyqtyń maqsaty óńirdiń tarıhı-mádenı murasyn dáripteý bolmaq. Mundaı ortalyqtar elimizdiń barlyq óńirlerinde jumys isteıdi. Oblys ákimi Arhımed Muhambetov mádenıet basqarmasy basshysynyń usynysyn qoldady. Sondaı-aq, ol óńirdi tanystyratyn 10-15 mınýttyq beınefılm jasaýdy tapsyrdy.
