Qostanaı oblysynda taksı júrgizýshisin tonaǵandar ustaldy
QOSTANAI. QazAqparat – Qostanaılyq polıtseıler taksıshige qaraqshylyq shabýyl jasaǵan úsh kúdiktini ustady, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Oqıǵa 9 sáýir kúni túnde bolǵan. Úsh jigit Amangeldi kóshesindegi dúkennen «Tekstılşık» saıajaı qoǵamyna deıin «Indraıver» arqyly taksı shaqyrǵan. Shaqyrtýǵa «Lada Kalına» avtokóligimen 38 jastaǵy taksı júrgizýshisi keldi.
«Eki jigit artqy oryndyqqa, bireýi júrgizýshiniń janynda otyrdy. Adam az jerge kelgen kezde artta otyrǵan bireýi taksıshiniń moınyn arqanmen qylǵyndyryp, aqsha talap etken. Júrgizýshi sytylyp shyǵyp, qylmys týraly «102» nómirine habarlap úlgergen. Osy ýaqytta kúdiktiler eki uıaly telefon men vıdeo tirkegishti alyp, qashyp ketken. Oqıǵa ornyna kelgen polıtsııa patrýli jábirlenýshiniń aıtýy boıynsha kúdiktiler týraly málimet jınaǵan. Tártip saqshylary barlyq kúzet oryndaryna habarlady», - delingen polıtsııanyń aqparatynda.
Habar alǵan aǵa leıtenant Jánibek Myrzahmetov pen aǵa serjant Amantaı Baıjanov Qorǵan kóshesiniń boıymen júrip, sıpattamaǵa sáıkes keletin eki kúdikti jigitti kóredi. Júrgizýshi kúdiktilerdi birden tanyǵan. Úshinshi jigit keıin óz páterinde ustaldy.
«Taksıshini tonaǵan Qostanaı oblysynyń 20 jáne 24 jas aralyǵyndaǵy turǵyndary bolyp shyqty. Bári de buryn sottalǵan. Buǵan deıin olar oblys ortalyǵy salondarynyń birinde tatýırovka salýshy bolyp jumys istegen. Tótenshe jaǵdaı kezinde oblysta patrýl kúsheıtilgenin eskertemiz», - deıdi polıtsııanyń baspasóz qyzmetindegiler.
Qazir osy derek boıynsha QR QK 192-baby 2-bóligimen («Qaraqshylyq») sotqa deıingi tergeýdi bastady.
