Qostanaı oblysynda tabıǵı apattan zardap shekkenderge BQO-dan kómek uıymdastyrylyp jatyr
«AMANAT» partııasy BQO fılıaly atqarýshy hatshysynyń orynbasary Kenesary Nurshınovtiń aıtýynsha, demalysqa qaramastan, gýmanıtarlyq kómek qabyldaý pýnktterine turǵyndar kelip, qostanaılyqtarǵa qolushyn sozýda.
Onyń aıtýynsha, Oralda «AMANAT» partııasy BQO fılıaly ǵımaraty men Dostyq úıinde gýmanıtarlyq kómek qabyldaý pýnktteri ashyldy. Sonymen qatar osyndaı oryndar barlyq aýdandyq fılıaldar janynan uıymdastyryldy.
«Un, kúnbaǵys maıy jáne basqa azyq-túlik, kúndelikti halyq tutynatyn buıymdar jınaqtalǵannan keıin arnaıy kólikter Qostanaı oblysyna jol tartatyn bolady. Biz qostanaılyqtarmen birgemiz. Halqymyzdyń basynan talaı qıyndyq ótken. Arys oqıǵasy, óz oblysymyzda Shalǵyn, Jaqsybaı aýyldary sýǵa ketken kezde de osyndaı kómekter kórsetildi. Sondyqtan bul joly da tabıǵat apat zardaptaryn eldiń jumylýy arqasynda jeńip shyǵatyn bolamyz», dedi K.Nurshınov.
Kásipker, qalalyq máslıhat depýtaty, «AMANAT» partııasy fraktsııasynyń múshesi Nurgúl Ashyqovanyń sózine qaraǵanda, bul iske kópshilik barynsha ún qosýda. Oblystyq, qalalyq máslıhat depýtattary, jergilikti kásipkerler uıytqy bolýda. Aıtalyq, kásipkerler ózderi shyǵaratyn ónimderdi, jyly kıim-keshek, jeke gıgıenalyq zattardy jiberetin bolady.
