Qostanaı oblysynda surapyl jel 40 úıdiń shatyryn qıratyp ketti
ASTANA.QazAqparat - Qostanaı oblysynda burshaq jaýyp, surapyl jel turýy saldarynan 40 úı shatyrynyń qurylysy búlindi, dep habarlaıdy alau.kz.
«8 maýsym kúni saǵat 17.40-ta Qostanaı oblystyq TJ departamentiniń kezekshilik qyzmetine Qostanaı-2 turǵyn úı alabynda qatty jel saldarynan úılerdiń shatyrlary ushyp jatqandyǵy jaıly habarlama kelip tústi. Oqıǵa ornyna Qostanaı oblysy TJ departamenti jáne Qostanaı TJ basqarmasynyń jedel toptary jetti», - dep habarlaıdy Qostanaı oblystyq TJ departamentiniń baspasóz qyzmeti.
TJD qyzmetkerleri Qostanaı-2 turǵyn úı alabynda 37 jer úıdiń shatyry qıraǵandyǵyn anyqtady. Búlingen jerler aýmaǵy shamamen 1512 sharshy metrdi qamtıdy. Qurban bolǵandar joq. 38 jastaǵy zardap shekken áıelge alǵashqy medıtsınalyq kómek kórsetildi.
Saǵat 19.50 kezinde oqıǵa ornynda qatty jel saldarynan búlingen jerlerdi qalypqa keltirý maqsatynda jedel shtab quryldy.
«Jel saldarynan qıraǵan jerlerdi qalpyna keltirýge 25 tehnıka jáne 85 adam jumyldyryldy. Onyń quramynda Qostanaı oblystyq TJD, Soltústik ÓAJQT, «QazTransGazAımaq», «Forfaıt» EPK, Qostanaı ákimdiginiń TKSh bar», - delingen Qostanaı oblystyq TJD habarlamasynda.
