Qostanaı oblysynda sý tasqynynan zardap shekkenderge bir aıdyń ishinde shyǵyndary tólenedi
QOSTANAI. QazAqparat - Qostanaı oblysynyń ákimi Arhımed Muhambetov ótken jeksenbide Qarasý aýdanyndaǵy sý tasqynynan zardap shekken aýyldarǵa bardy, dep habarlaıdy «QazAqparat» HAA tilshisi.
Óńir basshysy birneshe eldi mekenderde bolyp, jergilikti bılik ókilderi jáne turǵyndarymen kezdesti. Ol sý tasqynynan múlkine zaqym kelgen aýyl turǵyndarynyń suraqtaryna jaýap berdi.
Muhambetovtiń aıtýynsha, kómek barlyq turǵyndarǵa kórsetiledi jáne eshkim eskerýsiz qalmaıdy. Ákimniń pikirinshe, qazirgi tańda zardap shegýshilerdiń keıbiri menshik qujattaryn ótkizbegendigi kedergi keltirýde: zardap shegýshilerdiń birinde jyljymaıtyn múlik qujaty rettelgen tártipte rásimdelmese, endi biriniń tórt túlik maly tirkelmegen.
Sonymen qatar, qajetti dálelder bolǵan jaǵdaıda, rásimdelmegen múliktiń zalaly demeýshiler men qaıyrymdyq jasaýshylardyń qarjysy esebinen óteledi. Adamdar belgilengen retpen bıýdjetten ótemaqy alady. Demeýshilik qarjy 5 mamyrǵa deıin, al bıýdjettik qarajat - 20 mamyrǵa deıin bólinedi.
Buryn habarlanǵandaı, sý tasqynynan keltirilgen zalaldyń aldyn ala quny shamamen 200 mln teńgeni quraıdy. Qalpyna keltirý jumystarynyń somasyn arnaıy komıssııa anyqtaıdy.
«Biz úzdiksiz jumys jasap jatyrmyz, jaǵdaı óz baqylaýymyzda», - dep atap ótti Arhımed Muhambetov.
