Qostanaı oblysynda sý basýy yqtımal 39 eldi meken baqylaýǵa alyndy
QOSTANAI. QazAqparat - Qostanaı oblysynda qazirgi sý tasqyny kezeńinde tótenshe jaǵdaılar tirkelgen joq, dep habarlaıdy QazAqparat oblystyq tótenshe jaǵdaılar departamentiniń bastyǵy Talǵat Kákimovke silteme jasap.
Oblystyq TJD basshysynyń aıtýynsha, kóktemgi sý tasqyny oblys turǵyndaryn, sondaı-aq memlekettik múddeli organdardy da alańdatty. Sondyqtan barlyq kúshtik qurylymdar tasqynnyń aldyn alý sharalaryn júrgizýge baǵyttalǵan.
«Tótenshe jaǵdaılardyń aldyn alýǵa jáne joıýǵa 378 mln 894 myń teńge bólindi. Qalalar men aýdandardyń ákimdikterimen 20,8 myń tonna ınertti materıal, 52,8 myń qum salynǵan qap, 119,5 tonna janar-jaǵarmaı materıaly daıyndaldy. Turǵyn úılerdiń erigen sýlarmen sý basý qaýpin boldyrmaý maqsatynda 1,89 mln tekshe metr qar shyǵaryldy. Osy jyldyń 18 naýryzynan bastap departamenttiń daǵdarys ortalyǵynda organdarynyń basqarý qyzmetiniń kúshteri men aktıvterdi úılestirý jónindegi aımaqtyq jedel shtab quryldy. Shtab quramyna azamattyq qorǵaý qyzmetteriniń ókilderi kirdi», - dep málim etti departament basshysy.
Oblysta103 gıdrotehnıkalyq qurylys bar. Sýdy aǵyzyp jiberýge bıýdjetten qosymsha qarjy bólinip, tehnıkalar satyp alyndy. Oblystyń batys, ońtústik jáne soltústik bólikterindegi tótenshe jaǵdaıdy boljaý úshin jumys toby ushaqpen tekseris ótkizdi. Ǵaryshtan túsirilgen sýretter de kómek kórsetýde. Reseı tarapynan sý tasqyny kólemi jónindegi ózara árekettestik retke keltirildi.
«Sý basý qaýpi yqtımal 39 eldi meken áli de baqylaýda. Onyń ishinde 6 eldi mekenge sý alqaptardan, al qalǵan 33 aımaqqa ózender men kólderden sý kelýi múmkin. Sý tasqynyn apatsyz ótkizý maqsatynda osy jyly jarylys jumystarynyń kólemi men sany artty. 20 sý qoımasy ýchaskesinde muzdy qoparý úshin 8 aýdanda jarylystar júrgizildi. Sý tasqyny jaǵdaıy turaqty jáne únemi baqylaýda. Aýyl aımaqtaryn sý basty degen aqparat kelip túsken joq», - deıdi Talǵat Kákimov.
Qostanaı oblysynda uzyndyǵy 44,8 shaqyrym joldyń sý tasqynyna ushyraý qaýpi bar. Tasqyn aımaqtarynan evakýatsııalanǵan azamattardy ýaqytsha ornalastyrý úshin 1496 kereýet jáne 49,5 myń tonna azyq-túlik daıyndaldy. Sý tasqyny kezindegi qaýipsizdik sharalarynyń erejeleri týraly halyqty aqparattandyrý jáne oqytý úshin jumys júrgizilýde.
