Qostanaı oblysynda sottaǵy áıel ólimi úshin kúzetshini jazalaıdy
QOSTANAI. QazAqparat - Prokýratýra sotqa mamandandyrylǵan kúzet qyzmeti basqarmasy qyzmetkerleriniń jumysqa salǵyrttyǵy týraly qylmystyq isti jiberdi.
Ol kelýshilerdi durys teksermegendikten, kisi ólimi oryn aldy, dep habarlady «QazAqparat» HAA tilshisi.
Budan buryn habarlaǵandaı, 28 aqpanda Amangeldi aýdandyq soty ǵımaratynda, sot otyrysy zalynda neke buzý úderisine kelgen Amangeldi aýdanynyń turǵyny óz jubaıyn óltirdi. Ol búktemeli pyshaqpen áıelin birneshe jerden pyshaqtaǵan, saldarynan ol qaıtys boldy.
«Amangeldi aýdandyq soty oblystyń memlekettik kúzet qyzmetine jatatyn nysan bolǵany eskerilip, Qostanaı oblystyq mamandandyrylǵan prokýratýrasy polıtsııa qyzmetkerine qarsy sot aldy tergeýdi bastady, delingen Qostanaı oblysy prokýratýrasynyń baspasóz qyzmetiniń habarlamasynda. - Oǵan QR QK 371-baby 2-bóliginde kózdelgen qylmys belgileri boıynsha aıyp taǵyldy.
Tergeý «2017 jylǵy 28 aqpanda polıtsııa qyzmetkeri sotta kezekshilikte ótkizý rejiminiń tıisti deńgeıin qamtamasyz etýge mindetti tulǵa bola tura, normatıvtik-quqyqtyq akt talaptaryn buzyp, sotqa kelýshilerdi tıisti deńgeıde teksermegen. Saldarynan kelýshi sot ǵımaratyna pyshaq alyp kirip, arty qasaqana kisi óltirýmen aıaqtaldy», - dep atap ótiledi vedomstvo baspasóz qyzmetinde.
Tergeý 14 naýryzda aıaqtaldy. Qylmystyq is máni boıynsha qaraý úshin sotqa jiberildi.
